Жастар саясаты
Өткен жұма, 19 қараша күні Ә.Бөкейхан университетінде Семей қаласында әлеуметтік кәсіпкерлікті дамыту мәселелері жөнінде дөңгелек үстел өтті.
Дөңгелек үстелді «Шығыс Қазақстан облыстық Жастар мен балалар ұйымдарының қауымдастығы» заңды тұлғалар бірлестігінің Семей қалалық филиалы «Тұрақты даму мақсатында әлеуметтік кәсіпкерлікті дамыту жөніндегі іс-шаралар» жобасы аясында ұйымдастырды.
Жиынға «ШҚО Жастар мен балалар ұйымдарының қауымдастығы» заңды тұлғалар бірлестігінің директоры Эльзира Жүнісова, Семей қалалық Жастар ресурстық орталығы директорының Олжас Соғымбай, Семей қалалық кәсіпкерлік бөлімінің бас маманы Әзімхан Арин, «Атамекен» ШҚО кәсіпкерлер палатасының бизнес-тәлімгері Лаура Байділданова, Alikhan Bokeikhan University бизнес және басқару кафедрасының аға оқытушысы Фазыл Аубакиров, Семей қаласындағы Niet.Woman қоғамдастығының төрайымы Еркежан Тұрсынбаева қатысты.
Жиында қаладағы шағын және орта бизнесті дамыту, жастарды қолдау, әлеуметтік кәсіпкерлік тақырыбы қозғалды.
— Ағымдағы жылдың 1 қарашасына тіркелген шағын және орта бизнес субъектілерінің саны – 26 762. Оның ішінде 22 597-сі жұмыс істеп тұр. Қаңтар мен қазан айларында шағын және орта бизнестің өнім көлемі 112 459 млн теңгені, кәсіпкерлік кәсіпорындарда ашылған жаңа жұмыс орындарының саны 1649 адамды құрады, — деді қалалық кәсіпкерлік бөлімінің бас маманы Әзімхан Арин.
Семей қаласындағы Niet.Woman қоғамдастығының төрайымы Еркежан Тұрсынбаева әлеуметтік кәсіпкерлік жайлы сөз қозғады.
— Niet.Woman қоғамдастығы әлеуметтік осал топтағы және көп балалы аналармен үш жылдан бері жұмыс істеп келеді. Семинарлар, бизнес сабақтар ұйымдастырып, оларға өз бизнестерін, кәсіптерін бастауға көмектесеміз. Осы жұмыстарымыздың нәтижесінде жарты жылдың ішінде он бір әйел өз кәсіптерін бастап кетті. Бұл – біз үшін үлкен жетістік. Әйелдердің қаржылық сауаттылығын арттырып, бизнес-жоспар жасауды, жеке кәсіпкерлік ашуды, салық төлеуді үйретеміз. 1 қаңдарда елімізде «Әлеуметтік кәсіпкерлік» туралы заң шығады. Айта кететін жайт, әлеуметтік кәсіпкерлікті қайырымдылықпен шатастыруға болмайды. Кейбір адамдар жалақысының он пайызын қайырымдылыққа аударса, өзін әлеуметтік кәсіпкермін деп есептейді. Біз қызметімізден ақша таба отырып, әлеуметтік осал топтағы адамдардың бизнес бастауына көмектесеміз. Мен кәсіпкерліктен бұл салаға өз еркіммен келдім. Мақсатым – көп ақша табу емес, әлсіз жандарға көмектесу. Иә, қазіргі күні «әлеуметтік кәсіпкер» түсінігі көпшілікке таңсық. Көрші Ресейде бұл сала өте жақсы дамыған. Жаңа жылда заң шыққан кезде, әр қалада үйлестіруші тағайындалып, әлеуметтік кәсіпкерлердің тізімі жасалатын болады. Әрі қарай бұл сала елімізде қарқынды дамиды деп сенемін,- деді Еркежан Тұрсынбаева.
«Атамекен» ШҚО кәсіпкерлер палатасының бизнес-тәлімгері Лаура Байділданова «Еңбек» өнімді жұмыспен қамту және жаппай кәсіпкерлікті дамыту бағдарламасының аясындағы «Бастау» жобасының іске асу барысы туралы айтып берді. Елімізде «Еңбек» өнімді жұмыспен қамту және жаппай кәсіпкерлікті дамыту бағдарламасы аясындағы «Бастау» жобасы бесінші жыл қатарынан іске асып келеді.
— «Жұмыспен қамтудың жол картасы — 2025» бизнесті қолдау және дамытудың мемлекеттік бағдарламасын іске асыру бойынша қарқынды жұмыстар жүргізілуде. Жыл басынан бастап 545 жобаға қолдау көрсетілді. 385 жоба субсидияланды. Субсидия соммасы – 576,4 млн теңге. Мамыр айы бойынша мемлекеттік гранттарды алудың облыстық конкурсына 33 бизнес субъектісі қатысты. Конкурс нәтижесі бойынша жеті жобаға жалпы сомасы 21,5 млн теңге берілді. Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған «Еңбек» мемлекеттік бағдарламасын іске асыру барысында ағымдағы жылдың 10 айында 50 жобаға қолдау көрсетілді, — деген «Атамекен» ШҚО кәсіпкерлер палатасының бизнес-тәлімгері Лаура Байділданова мемлекеттік грант тек жұмыссыз адамдарға ерекше бизнес жобалары үшін берілетінін атап өтті. Бизнес-тәлімгердің айтуынша, жақсы бизнес-жоба ұсыну арқылы 500 мыңнан бес миллион теңгеге дейін қайтарымсыз грант ұтып алуға болады.
Дөңгелек үстел барысында қатысушылар өзара пікір алмасып, жастарды аталмыш жобаларға тарту мәселесін талқылады.
Жадыра ТӨЛЕГЕНҚЫЗЫ,
«Семей таңы»
