Мемлекет қолдауы
Семейде «Еңбек» мемлекеттік бағдарламасы бойынша бизнес-идеялардың 8 жобасы мақұлданды.
Семей қаласы әкімдігінің жұмыспен қамту, әлеуметтік бағдарламалар және азаматтық хал актілерін тіркеу бөлімінде жаңа бизнес-идеяларды іске асыру үшін мемлекеттік гранттар алуға үміткерлердің өтініштерін қарау жөніндегі комиссияның отырысы өтті. Гранттар «Еңбек» мемлекеттік бағдарламасының екінші бағыты бойынша беріледі.
Комиссия 9 адамның бизнес-жобаларын тыңдап, оның ішінде 8 адамның жобаларын мақұлдады.
Әр гранттың сомасы 583 400 теңгені құрайды. Мақұлданған жобаларға бөлінетін жалпы сома — 4 миллион 667 мың теңге. Бұл қаражат грантқа ие болған Семей қаласының тұрғындарына 29 қараша күні беріледі.
Ұсынылған бизнес-жобалар ірі қара малдарды өсіруге, шошқа шаруашылығына, тігін өндірісіне, автомобильдерді жөндеуге және т.б. бағытталған. Мысалы, Бекжан Айтмұханбетов автомобильдерді жөндеу бойынша бизнес-жобасын іске асыруға ниетті. Ал Николай Смирнов шошқа шаруашылығын дамытуға арналған жобасын ұсынды.
2021 жылға Семей қаласы бойынша 200 айлық есептік көрсеткішке дейінгі мөлшерде 220 өтеусіз грант беру жоспарланған. Оның ішінде бүгінгі күні 116096,6 теңге сомасына 199 грант берілді.
Бұрынғы жеңімпаздар арасында грантты мақсатсыз пайдаланғандар да бар. 12 адам өздеріне бөлінген қаражатты мақсатты пайдалану бойынша есеп тапсырмады. Грантқа бөлінген ақшаны қайтару үшін оларға қатысты істер сотқа берілді.
Айта кету керек, мемлекеттік гранттар қаражатын жаңа бастаған кәсіпкерлер еңбек құралдарын, құрал-саймандарды, технологиялық жабдықтарды, жануарларды, құстарды сатып алу және жалдау ақысын төлеу үшін ғана пайдалануы тиіс.
«СТ» — ақпарат
