Президент тапсырмасы аясында
Сейсенбі 16 қараша күні облыс әкімі Даниал Ахметов ауыл тұрғындарын жайылымдық жермен қамтамасыз ету мәселесі бойынша кеңес өткізді.
Қазір облыстағы жайылымдық жер қажеттілігі 700 мың гектарды құрайды.
— Өскемен, Семей және Риддер қалаларына қатысты мәселе толығымен шешімін тапты. Дегенмен бірқатар аудандарда тапшылық байқалып отыр. Ауыл шаруашылығы басқармасының өз жұмысын тиісті деңгейде атқармауынан, мәселені шешу кешіктіріліп жатыр. Пайдаланылмай жатқан жерлерді қайтарып алу жұмысы жолға қойылған. Кәсіпкерлермен өз еркімен немесе сот арқылы қайтару туралы келіссөздер жүргізу қарастырылуда,- деді облыс әкімі Даниал Ахметов.
Облыс басшысының айтуынша, аудандарда жетіспейтін жайылым жерлер анықталып, елді мекендердің әкімшілік шекарасына енгізілген. Әр ауданның мүмкіндіктері, құдықтар мен суару орындары анықталған.
Бүгінде Шығыс Қазақстан халқының 40 пайызы ауылда тұрады. Ауылдықтардың негізгі күн көрісі мал шаруашылығы болғандықтан, пайдаланылмай жатқан жер телімдерін қайтару, жайылымдық жер тапшылығын жою мәселесі бірінші кезекте тұрғаны анық.
Семей қаласында да пайдаланылмай жатқан ауыл шаруашылығы мақсатындағы жер телімдерін анықтап, мемлекет меншігіне қайтару жұмыстары жүргізілді. Бұл туралы 17 қараша күні өткен баспасөз мәслихатында Семей қалалық жер қатынастары бөлімінің басшысы Құдайберген Сейілханов айтты.
– Жергілікті атқарушы органдардың шешімдері мен сот шешімдерінің күшін жою негізінде жеті шаруа қожалығының, заңды және жеке тұлғалардың жалпы көлемі 14,9 мың гектар пайдаланылмай жатқан жерлері мемлекет меншігіне қайтарылды. Алдағы уақытта бұл жерлер конкурстық негізде ауыл шаруашылығы айналымына тартылады, – деді Құдайберген Сейілханов.
Бөлім басшысының айтуынша, биыл ауыл шаруашылығы мақсатындағы жерлерді беруге төрт конкурс өткізілген. Жыл соңына дейін жер қатынастары бөлімі жалпы көлемі 74,816 мың гектарды құрайтын 52 ауыл шаруашылығы мақсатындағы жер телімдерін көрмеге қойып, сатуды жоспарлап отыр.
Қала шегінде жер телімдерін жалға беру құқығын сатуға келетін болсақ, жыл басынан бері сегіз аукцион өткізілген. Алынған қаражаттың жалпы сомасы 169 млн теңгені құрады.
– 2020 жылдың 1 қарашасында қала аумағы 2,7 млн гектарды құрады. Ауыл шаруашылығы жерлері – 1 миллион гектардан сәл астам, оның ішінде егістік – 11,8 мың гектар. Елді мекендердің жерлері 249,2 мың гектар. Жайылымдық жер – 1,3 млн гектар, оның ішінде полигондар – 981 мың гектар, – деп нақтылады Құдайберген Сейілханов.
Өз тілшіміз
