Шығыс Қазақстан облысында алдағы бес жылда 40,6 мың гектар жерге 196,8 миллион көшет отырғызылады.
Естеріңізде болса, ел Президенті өткен жылғы 1 қыркүйектегі Жолдауында мемлекеттік орман қоры алқаптарына 2 миллиард ағаш отырғызуды тапсырған еді. Президент тапсырмасына орай, облыстың табиғат қорғау мекемелері ормандарды толықтырудың кешенді жоспарын әзірлеген болатын.
Жоспарға сәйкес, облыстық табиғи ресурстар және табиғат пайдалануды реттеу басқармасына қарасты он үш орман шаруашылығы он бес мың гектар жерге 76 000 000 түп көшет отырғызуға тиіс.
Семей орманы мемлекеттік орман табиғи резерватына 25 400 гектарға 120 600 000 мың көшет отырғызу міндеттелген.
Катонқарағай мемлекеттік ұлттық табиғи паркіндегілер 198 гектар жерге 792 000 көшет отырғызады. Бір жыл ішінде осы аталған мекемелер жалпы көлемі 4151 гектар аумаққа 23 581 000 көшет отырғызып үлгерген. Орман мекемелері ағымдағы жылы 32,62 гектар алқапқа орман тұқымын сепкен.
Шаруа көлемі ұлғайғандықтан «Семей орманы» мекемесі республикалық бюджет есебінен 46 трактор сатып алыпты. Ал Орман шаруашылығының мекемелері 2022 жылы 10, 2023 жылы тағы 10, 2024 жылы алты техника сатып алуды жоспарлап отыр.
Мамандар алғашқы екі жыл ең маңызды кезең деп отыр. Бұл дайындық кезеңі болып есептеледі. Көшеттердің негізгі бөлігі 2023 жылдан бастап отырғызылады. Оған дейін тұқымдар көктеп үлгеруі тиіс.
«Семей орманы» мемлекеттік орман табиғи резерваты 22 миллионға жуық ағаш ексе, Катонқарағай ұлттық паркінің ұжымы 38 гектар жерге 184 мың түп жасыл желек отырғызды. Ағаш отырғызу шарасында коммуналдық орман шаруашылығы мекемелері де белсенді жұмыс жүргізуде.
«СТ» — ақпарат
