Құрметті семейліктер!
Соңғы күндері бүкіл еліміз лаңкестердің кесірінен күрделі сынақтарды басынан өткеріп келеді.
«Бейбіт митингтерді» желеу етіп, ел сеніміне кірген террористердің басты мақсаты маңызды стратегиялық нысандарды күшпен басып алу болды.
Біздің қалада қылмыскерлер әкімдік ғимаратын бұзып кіріп, жиһаздар мен техниканы шағып, өртеген. Бірақ, әскерилер мен құқық қорғау органдары қызметкерлерінің бірлескен жұмысының нәтижесінде стратегиялық нысан лаңкестерден тазартылды. Қылмыскерлер қолға түсті. Қатысы барларды іздестіру жалғасуда. Тергеу амалдары жүріп жатыр.
Қазіргі таңда тәртіп толық орнады. Қоғамдық-саяси ахуал тұрақты. Қаланың тыныс-тіршілігін қамтамасыз ететін барлық қызметтер штаттық режимде жұмыс атқаруда. Қоғамдық көлік, жылу-, су-, электр қуатымен қамтамасыз етуде ақау болған жоқ. Барлық әлеуметтік төлемдер, еңбек ақы мен зейнетақылар уақытылы төленеді. Алаңдауға еш негіз жоқ.
Қымбатты жерлестер!
Төтенше жағдай кезеңінде тағат танытып, шектеу шараларына түсіністікпен қарағандарыңыз үшін шынайы алғысымды білдіремін.
Қалыпты өмірге оралу үшін біз әр нәрсеге қырағы болып, деструктивті күштердің жетегіне ермей, қарсы тұруымыз қажет.
Қауіпсіздігіміз үшін коменданттық сағат режимін қатаң сақтап, үйден тек аса қажетті жағдайда ғана шығуды сұраймын.
Береке-бірлігімізді сақтап, аталы сөзге тоқтап, бабалар аманаты, ұрпақ болашағы үшін күш біріктіріп, сын-қатерлерден аман өтейік, ағайын!
Сәбилеріміздің ұйқысы тыныш болсын!
