Жамбыл облысында салынып жатқан Меркі-Бурылбайтал тас жолының жұмысшылары ереуілге шықты. Олар жалақыны көтеріп, еңбек жағдайын жақсартуды талап етіп отыр. Бұл туралы Atameken Business телеарнасының сюжетінде хабарланды.
Ереуілшілердің айтуынша, үш жыл бойы қытайлық «Синьсин» компаниясы оларға ең төмен мөлшердегі жалақы төлеп келген. Басшылық барлық талаптарды орындамайынша жұмысқа шығудан бас тартқан 80-нен астам жұмысшы Қазақстан Президентінен көмек сұрады.
«Қытайлық компанияда біз жалдамалы жұмысшымыз. Мұндай жағдайға төзу мүмкін емес екенін екі айдан бері айтып келеміз. Бізге «ұнамаса, кетіңдер» деді. Бұл жерде арнайы киім де жоқ», – деді жұмысшы Мергенбай Дабылов.
Аталған жол құрылысы нысанында 200-ге жуық жергілікті тұрғын жұмыс істейді. Жалақы 60 мың теңгеден басталып, ең жоғарғы мөлшері 120 мыңнан аспайды. Жұмысшылардың айтуынша, 10 сағаттық жұмыс күніне бұл мардымсыз жалақы.
Қытай компаниясының басшылығы жобаның өзі тиімсіз деп мәлімдеді. Барлық есептеулер 2017 жылғы баға негізінде жасалған.
«2017 жылдан бастап құрылыс материалдарының бағасы қымбаттады. Қазір өзіміз де шығынға батып жатырмыз. Сондықтан біз жалақыны көтере алмай отырмыз», – деді компанияның бас инженері Цюань Ицюань.
Жамбыл облысы әкімінің орынбасары Нұржан Календеров бұл мәселені тек қытайлық компания шеше алатынын айтты.
«Не айтатынын күтейік. Уәде еткендеріндей, үш күнде жалақыны көтерулері керек. Шешілмесе, Бас прокуратураға жүгінеміз», – деді ол.
Сөйтіп, екі тарап ортақ келісімге келе алмай тарқасты. Ал «Синьсин» өкілдері үш күн ішінде жалақы мәселесін шешуге тырысып көрмек.
