Шығыс Қазақстан облысында дала өртінің алдын алу үшін 44 мобильді топ құрылды, деп хабарлайды SemeyTany.kz ақпараттық порталы ҚазАқпаратқа сілтеме беріп.
ШҚО Төтенше жағдайлар департаменті баспасөз қызметінің мәліметіне сүйенсек, өңір аумағында өткен демалыс күндері 150-ден астам рет шөп өртенді. Тілсіз жаудың алдын алу үшін құтқарушылар рейд жүргізуде. Бұл мақсатта 312 маманнан тұратын 44 мобильді топ құрылған.
«Семейдегі Мирный саяжай қауымдастығы аумағындағы 8 үй мен 6 шаруашылықтың қора-жайы өртенген. Өрт сөндірушілер жалпы ауданы 1000 шаршы метрді құраған жалынды ауыздықтады. Барлығы 40 адам мен 11 техника жұмылдырылған. Ал Ұлан ауданы Асубұлақ ауылында шөп жанып, от 4 жер үй мен 3 гаражға тарады. Көп ұзамай аумағы 400 шаршы метрге жеткен өрт өшірілді. Жалын қоқыс жағу кезінде қауіпсіздік талаптарының сақталмауынан шыққан», — делінген ақпаратта. Биыл ТЖД қызметкерлері 20 профилактикалық рейд жүргізді. Нәтижесінде, далада шөп өртеген 2 адам әкімшілік жауапкершілікке тартылды. Естеріңізге сала кетсек, осыған дейін Семейде құтқарушылар отқа оранған үйден мүгедек адамды алып шыққанын хабарлаған едік.
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
