ӨҢІР ДАМУЫНДАҒЫ ЖАҢА МҮМКІНДІКТЕР ТАЛҚЫЛАНДЫ
Қазіргі таңда «AMANAT» партиясы өкілдері өңірлерді аралап, халықпен кездесулер өткізуде. Мұндай жүздесулер өткен аптаның соңында еліміздің шығысында да жалғасын тапты.
Шығыс Қазақстан облысына арнайы сапармен келген «AMANAT» партиясының атқарушы хатшысы Асхат Оралов жергілікті тұрғындармен, зиялы қауым өкілдерімен, партия белсенділерімен және студент жастармен бірқатар кездесулер өткізіп, Жаңа Қазақстанды құру міндеттеріне сәйкес Президент Жолдауын іске асыру және партияны жаңғырту мәселелерін бірлесіп талқылады.
Партияның атқарушы хатшысы «Ардагерлерді ардақтайық!» және «Кедергісіз келешек» партиялық жобалары аясында өткен іс-шараларға қатысты.
Алдымен Абайдың «Жидебай — Бөрілі» қорық-мұражайына атбасын тіреген «AMANAT» партиясының атқарушы хатшысы Абай ауданының ақсақалдарымен жүздесті.
— Мемлекет басшысы Қасым-Жомарт Тоқаев өзінің 16 наурыздағы тарихи Жолдауында үш жаңа облыс құрылатынын айтты. Абай облысының орталығы Семей қаласы болады. Бұл тарихи әрі әділетті шешім, ең алдымен, өңірдің дамуына қуатты серпін беріп, оның тұрғындары үшін жаңа мүмкіндіктер жасайды, — деді өз сөзінде Асхат Оралов.
Өз кезегінде ақын, Қазақстан Жазушылар одағының мүшесі Төлеген Жанғалиев бұл Семей тұрғындары көптен күткенін шешім болғанын атап өтті.
— Біз Президенттің Жолдауын мұқият тыңдадық және оны толық қолдаймыз. Әсіресе Абай облысын құру жөніндегі шешіміне айрықша қуандық. Бұл шешім – Мемлекет басшысының хакім Абайға және шығыс жұртына деген құрметінің белгісі. Осында отырған ақсақалдар жағымды жаңалықты естіген күннің ертеңінде Мемлекет басшысына алғысын айтып, телеграмма жолдады, — бұл ретте деді Төлеген Жанғалиев.
Аталған жиын барысында ел өміріндегі елеулі жаңалықтар мен партияның алдағы жоспарлары жайында да кеңінен сөз болды.
Мұндай жиын Семей қаласында да өтті. Жергілікті зиялы қауыммен өткен кездесуде тарихи мұраны сақтау, тарихи-мәдени ескерткіштерді қалпына келтіру және өнерді дамыту мәселелері талқыланды.
— Абай облысын құру – Президенттің дана да, дара шешімі болды. Біздің облыс Жаңа Қазақстанды құруға, соның ішінде рухани, мәдени, әлеуметтік, экономикалық аспектілерге қомақты үлес қосатынына сенімдіміз, — деді филология ғылымдарының докторы, профессор Арап Еспенбетов.
Сондай-ақ атқарушы хатшы Ұлы Отан соғысының ардагері, жергілікті көнекөз қария 100 жастағы Александр Атавин, партия ардагерлері Оралхан Сартаев пен Владимир Халиннің үйлеріне де барып, амандық-саулық сұрасты.
Асхат Оралов аға буын өкілдеріне қамқорлық жасау мақсатын көздейтін «Ардагерлерді ардақтайық!» партиялық жобасы 2014 жылдан бастап жүзеге асып келе жатқанын айтып өтті. Осы уақыт аралығында ел аумағында 45 Белсенді ұзақ өмір сүру орталығы ашылды. Онда зейнет жасындағы 60 мыңнан астам адам бос уақытын тиімді өткізуде.
Бұдан соң «AMANAT» партиясының атқарушы хатшысы «Gold King» спорттық-сауықтыру кешенінде параспортшылармен жүздесіп, «Кедергісіз келешек» партиялық жобасы аясында ерекше қажеттіліктері бар адамдарды қолдау және қолжетімді қалалық орта құру мәселелерін талқылады.
Осы күні Асхат Оралов Шығыс Қазақстан облысының партия активімен кездесіп, «AMANAT» партиясын жаңғыртудың басымдықтарын талқылады.
Бүгінде өңірде 300-ге жуық бастауыш партия ұйымына біріктірілген 52 мыңнан астам партия мүшесі бар. Барлық деңгейдегі мәслихаттардың 290 депутатының 85,6 пайызы – «AMANAT» партиясының өкілі. 104 ауылдық округте өткен сайлау қорытындысы бойынша «AMANAT» партиясының атынан қатысқан кандидаттардың 82 пайызы жеңіске жеткен.
Жыл басынан бері Шығыс Қазақстан облысы бойынша партияның қоғамдық қабылдау бөлмелеріне 2,5 мыңнан астам өтініш келіп түскен. Негізінен, облыс тұрғындары әлеуметтік қолдау, жер телімдерін бөлу, тұрғын үй-коммуналдық шаруашылық мәселелеріне қатысты өтініш білдірген. Сонымен қатар наурыз айынан бастап мобильді қоғамдық қабылдаулар шалғай ауылдарға барып, жұртшылықпен кездесулер өткізді.
Асхат Оралов белсенді жастармен де жүздесті. Кездесу кезінде өскелең ұрпақты жергілікті жерлерде толғандыратын негізгі мәселелер талқыланды.
Бүгінде Шығыс Қазақстан облысындағы жас депутаттар корпусында «AMANAT» партиясына мүше 35 жасқа дейінгі 43 отандасымыз бар екен.
Әлібек КЕМЕЛХАН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
