AMANAT партиясы жанындағы жастар қанатының Шығыс Қазақстан облыстық филиалының ұйымдастыруымен 10-11 сынып оқушылары арасында «QAISAR» әскери-патриоттық ойыны ұйымдастырылды.
Шараның мақсаты — оқушылар арасында әскери-патриоттық сезімді қалыптастыра отырып, ұлттық рухты жігерлендіру. Жарысқа қатысушы жастарды қайсарлылық пен жігерлілікке баулу.
Ойын ережесіне сәйкес, ұлдар 3000 метр және қыздар 1000 метрге жүгіріп, 50 метрлік қашықтыққа жүзді.
Жастар қанаты төрағасының айтуынша, әскери-патриоттық ойын — «QAISAR» жобасы, ең алдымен, жас ұрпақты әскери қызметші мамандығымен және әскери қызметтің қыр-сырымен таныстыра отырып, физикалық және рухани принциптерді, стандартты емес жағдайларда жылдам әрекет ету дағдыларын жетілдіруге ұмтылысты қалыптастыруға бағытталған. Сондай-ақ жастарды біріктіру, жас ұрпақты патриотизм рухында тәрбиелеу, салауатты өмір салтын насихаттау- жарыстың басты міндеттері.
— 10-11 сынып оқушылары арасында «Qaisar» әскери-патриоттық спартакиадасы оқушылардың жан-жақты дамуын жетілдіру, олардың дене даярлығын және әскери қызметке дайындау үшін моральдық-психологиялық қасиеттерін арттыру мақсатында өткізілді. Жүгіру мен жүзуден өзіміздің бағымызды сынап, республикалық кезеңге 5 бала жолдама алдық. Салауатты өмір салтын ұстану, дені сау жас ұрпақты қалыптастыру мақсатында өткізілген шара үшін AMANAT партиясының жастар қанатына алғысымды білдіремін, — дейді сайысқа қатысушылардың бірі Бекайдар Жалғас.
2 күннің қорытынды есебі бойынша, қатысушылар арнайы І, ІІ және ІІІ дәрежелі дипломдармен, жетекшілері алғыс хаттармен марапатталды.
Жарыс нәтижесінде жобаның республикалық кезеңіне Шығыс Қазақстан облысының 5 оқушыдан тұратын командасы жасақталды.
Ерлан АЙҚЫНҰЛЫ,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
