ТҰРҒЫНДАРДЫ ҚАБЫЛДАДЫ
AMANAT партиясының Семей қалалық филиалының төрағасы, қала әкімі Бақытжан Байахметов азаматтарды жеке сұрақтары бойынша қабылдады. Қабылдауға көмек сұрап келген азаматтар түрлі мәселелер көтерді.
Зейнеткер Анатолий Решетняк «Бобровка» саяжай кооперативіне қатысты мәселелермен келіпті. Ол кооператив инфрақұрылымы, коммуналдық қызмет тарифтері, жолдарды жөндеу, жарықтандыру мәселелерін бұған дейін де бірнеше рет көтерген. Зейнеткердің сауалдарына жан-жақты жауап беріліп, әкімнің орынбасары Димитрий Гариковке жүгіну ұсынылды. Сондай-ақ өтініш берушінің мәселелерін егжей-тегжейлі қарау үшін жергілікті жерге комиссия барып, тексеру жүргізетін болады.
Семей тұрғыны Серік Асылбеков — бала кезінен 2 топтағы мүгедек. Оның анасы Роза Асылбекова 12 жыл бойы отбасымен бірге баспана ала алмай жүргенін жеткізді. 2010 жылдан бастап «1 және 2 топ мүгедектері» санаты бойынша кезекте тұр, кезек нөмірі — 520. Өтініш иесіне ҚР «Тұрғын үй қатынастары туралы» заңнамасы аясында жауап берілді. Қала әкімі сондай-ақ тұрғын үй инспекциясы бөлімінің басшысына тұрғын үйді субсидиялау мүмкіндігін қарастыруды және заңда белгіленген мерзімде партия филиалына ақпарат беруді тапсырды.
Иртышская көшесінде тұратын Сәуле Мамедова пәтеріндегі электр сымдарын алып тастап, есептеуіштің жұмысын реттеп беруді өтінді. Бұл мәселе оң шешімін тапты.
Қымбатхан Кәрімбеков — 3-топтағы мүгедек, Чернобыль ардагері, жеңілдіктер мен кепілдіктер бойынша ҰОС мүгедектеріне теңестірілген. Өтініш иесін оңалтудың жеке бағдарламасы жоқ. 72 397 теңге көлемінде зейнетақы алады. Қымбатхан Кәрімбеков қала әкімінен баспана алуға көмек көрсетуді сұрап келіпті.
Айта кетейік, мәслихаттың 2021 жылғы 8 қаңтардағы № 63/458-VI шешімімен бекітілген Әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларына сәйкес, ағымдағы жылдың сәуір айында оған, Жеңістің 77 жылдығына орай, «Чернобыль апатының салдарын жоюға қатысқан тұлғалар» санаты бойынша 100 000 теңге көлемінде бір жолғы әлеуметтік көмек көрсетілді. Ал тұрғын үй мәселесі бойынша Чернобыль ардагеріне ҚР «Тұрғын үй қатынастары туралы» заңнамасы аясында түсінік берілді. Қала әкімі тұрғын үй инспекциясының басшысы Диана Шаяхметоваға Қымбатхан Кәрімбековті жеке қабылдап, өтініштің мерзімін қарастыруды тапсырды. Мерзімі өткен жағдайда, заңнама бойынша ҰОС қатысушыларына теңестірілген Чернобыль ардагері ретінде тұрғын үй сатып алуға кезекке қою үшін кеңес беріліп, жұмыс нәтижелері туралы заңда белгіленген мерзімде партия филиалына ақпарат беру тапсырылды.
Гүлмира Балташева қызы Жансая Төлеубайқызын жұмысқа орналастыруға көмек көрсетуді сұрады. Жұмыспен қамту бөлімі, әлеуметтік бағдарламалар және АХАТ бөлімінің мәліметінше, Жансая Төлеубайқызы №8 емханаға және «Баст» АҚ-ға мейірбике лауазымына жұмысқа жіберілген. Бірақ медициналық сертификатының болмауына байланысты жұмысқа қабылданбаған. Ол сертификат алу үшін оқуға жазылды.
Семей тұрғыны Мақсат Құсатаев Алматинская көшесіндегі су құбырын жүргізу жұмыстарына қатысты сұрақ қойды. Қала әкімі Бақытжан Байахметов ТҮКШ бөлімінің басшысы Амантай Өтелбаевқа Дальняя ауданындағы Алматинская көшесін сумен жабдықтау жұмыстарын бақылауды тапсырды. Сонымен қатар Мақсат Құсатаев Семей қаласы бюджетінің ашықтығы тақырыбын қозғады. Қала әкімінің орынбасары Дархан Жөргекбаев пен экономика және қаржы бөлімінің басшысы Роза Құдайбергенқызына Семей қаласының әкімдігі мен мәслихатының ресми сайттарында бюджеттің орындалуының ашықтығын және барлық қажетті ақпараттың қолжетімділігін қамтамасыз етуге тапсырма берілді.
Қабылдауда болған азаматтардың мәселелері қала басшының назарында болады.
Анар АХМЕТҚАЛИЕВА,
«Семей таңы»
