Шығыс Қазақстан облысындағы ОВ 156/20 мекемесінің қызметкерлері Ораза айт мерекесіне орай 20-дан астам мұқтаж отбасыға азық-түлік жеткізді, деп хабарлайды Семей таңы ақпарат порталы ҚазАқпаратқа сілтеме жасап.
ШҚО бойынша ҚАЖ департаменті баспасөз қызметінің мәліметіне сүйенсек, ОВ 156/20 мекемесінің ұжымы қиын өмірлік жағдайдағы отбасыларға көмек көрсетті. Жалғызбасты ананың үйіне барған олар азық-түлік жеткізіп, балалардың біріне телефон сыйлады.
«Жолдасым бізді тастап кетті. Балаларымның қамы үшін жұмыс істеп тапқан ақшаны күнделікті ас-суларына әрең жеткіземін. Балапандарымның алды 3-сыныпта, ал кішкентайы 1-сыныпта оқиды. Мен жұмысқа кететіндіктен мектептен өздері қайтады. Қолдарында ұялы телефондары жоқ болғандықтан үйге аман-есен жетті ме екен деп күнде алаңдаймын. ҚАЖ қызметкерлері үлкен қызыма ұялы телефон сыйлап, азық-түліктің мол қорын әкеп берді. Бұл біз үшін үлкен көмек», — дейді әйел.
Түзету мекемесінің ұжымы тек қасиетті Рамазан айы мен Ораза айт мерекесінде ғана емес, басқа күндері де мұқтаж жандарға көмек қолын созып тұрады.
«Қолымызға азық түлік себеттерін ұстап жалғызбасты ананың үйіне барғанымызда, алдымнан жүгіріп шыққан кішкентай бүлдіршіннің айтқан сөзі мәңгі есімде қалады. 6 жасар бала «Анашым, қарашы қандай көп тамақ» деп айғай салды. Осыны естіген кезде жүрегім қатты ауырды. Балалардың азық түліктің қадірін білгені соншалық, оларға ешқандай ойыншық та керек болмады», — дейді мекеменің жас қызметкері.
