Астанадағы көпқабатты үйлердің бірінде тұратын тұрғындар соңғы бірнеше айдан бері тыныштықта өмір сүруден қалған. Өйткені, үйдің төменгі қабатынан ашылған «INVICTUS» фитнес-орталығы күні бойы музыканың дыбысын төмендетпейді екен. Полиция мен әкімдіктен көмек сұраған тұрғындарға мамандар «қолымыздан түк келмейді» деп жауап беретін көрінеді.
«Сказочный мир» тұрғын үй кешенінде тұратын Альбина Әтеннің екі ұлы бар. Үлкені мектеп оқыса, кішісі әлі жасына толмаған. Жас ананың шақалағы күндіз ұйқыдан қалған: фитнес-орталықтан шыққан музыка мен темір-терсектің дүрсілінен сәби шошып оянады екен. Ал, үлкен ұлы дәл осы себептен сабағын оқи алмайды. Соңғы айда оның үлгерімі күрт нашарлап кеткен.
«Фитнес-клубтың музыкасы, адамдардың жаттығып жатқаны, ауыр темірлердің «гүрс» еткен дыбысы біздің үйімізге, әсіресе ұлымның бөлмесіне қатты естіледі. Тұрғындар осы мәселені айтып, клуб әкімшілігіне бардық. Алайда, бізді түсінудің орнына ондағы қызметкерлер: «қайда барып арыздансаңдар да бәрібір» деді. Яғни, оларға көп шығын шығарып, дыбыс изоляциясын орнатқаннан, шағым түскенде айыппұл төлеп құтылған ғана тиімді болып отырған сияқты», — дейді Альбина Әтен.
Фитнес-орталық тарапынан дұрыс диалог орнамаған соң үй тұрғындары бірігіп, Нұр-Сұлтан қалалық санитарлық-эпидемиологиялық бақылау департаментіне арыз түсірген. Департамент мамандары фитнес-клубқа сараптама жасай келе, бұл мекеме шынымен де дыбыс нормаларын өте өрескел бұзып отырғанын анықтаған.
«Алайда, осыған қарамастан, яғни дыбыс нормасы бірнеше есе артық болса да, полиция бұл орталыққа айыппұл сала алмайды, оны жоспардан тыс тексере де алмайды. Өйткені, қазір шағын және орта кәсіпкерлердің жұмысын рұқсатсыз тексеруге мораторий жарияланған», — дейді үй тұрғыны.
Қалалық санитарлық-эпидемологиялық департаменттің баспасөз қызметі тұрғындардың өтініш айтқанын растап, олардан арыз түсе сала мамандар бірден нысанға барғанын хабарлады.
Альбина Атен айтқандай, департамент мамандары фитнес-клуб дыбыс нормасынан асыра жұмыс істеп отырғанын растап, құжатпен бекітіп берген.
«Біз бұл проблемадан хабардармыз. Шағын және орта кәсіпке қойылған мораторийге байланысты біз тексеруге рұқсат алу үшін республикалық санитарлық-эпидемологиялық бақылау жүргізу комитетіне хат жаздық, комитет Денсаулық сақтау министрлігіне хат жазып, министрлік кезектен тыс тексеру жүргізу үшін бұйрық шығаруы керек. Біз бұл мәселені назарда ұстаймыз», — деп хабарлады астаналық департаменттің баспасөз қызметі.
Альбина Әтен музыка мен темірдің дүрсілінен зардап шектім десе, осы үйде тұратын Нұрия Өмірзақованың жағдайы одан да күрделі. Оның пәтеріне музыка дыбысы аса қатты естілмесе де, фитнес-орталықтан шығатын жағымсыз иістің бәрі вентиляциялық құбыр арқылы ас бөлмеге тікелей жетеді екен.
«Қыста терезені аша алмай әбігерге түсеміз, жазда ас үйде тамақ ішу мүкін емес, тердің сасық иісінен құтыла алмай отырмыз», — деп шағымданды ол.
Бұл ретте, Нұр-Сұлтан қаласы санитарлық-эпидемологиялық бақылау департаментінің баспасөз қызметі ДСМ жауабын ала сала, фитнес-клубқа тексеру жүргізетінін хабарлады. Сондай-ақ, тексеру қорытындысы БАҚ өкілдері мен тұрғындарға да міндетті түрде хабарланады деп сендерді.
Ал, Альбина Әтен шағын және орта бизнеске қойылған мораторийдің шарттарын өзгертуді ұсынып отыр.
«Бізді ешкім тексере алмайды» деп басқа азаматтардың өмірі мен денсаулығына ешкімнің нұқсан келтіруге құқығы жоқ. Ал, дәл қазір заң бұзушылықты қарастыратын мерзімдер өте ұзақ. Тексеруге келгенше біздің денсаулығымызға зиян тие береді. Денсаулық комитеті мен полицияда ешқандай өкілеттілік жоқ. Қолдары байлаулы. Соттың істерді қарау мерзімі ұзақ», — дейді ол.
Тұрғындардың тыныштығын бұзған «INVICTUS» фитнес-орталығы тілшіміздің қоңырауна жауап берген жоқ.
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
