БІЛІМ БЕРУ САЛАСЫ БАСТЫ НАЗАРДА
Шығыс Қазақстан облысында білім беру саласына айтарлықтай көңіл бөлінуде. Былтырғы жылы білім беру нысандарының құрылысына және материалдық-техникалық базаны нығайтуға 13,1 млрд теңге бөлінген.
Бұл жайлы жуырда болып өткен облыстық мәслихаттың кезекті, XV сессиясында аймақ басшысы Даниал Ахметов айтып өтті.
— Өскемен қаласындағы технологиялық колледж бен құрылыс колледжіне арналған тоғыз қабатты екі жатақхананың құрылысы аяқталуда. 3-тен 6 жасқа дейінгі балаларды мектепке дейінгі тәрбиемен қамтамасыз ету мәселесі жүз пайыз дерлік шешімін тапты. Өскемен және Зайсан қалаларында шағын орталықтар мен 1220 орындық жеті жекеменшік балабақша ашу есебінен екі жастан алты жасқа дейінгі балаларды мектепке дейінгі ұйымдармен қамтамасыз ету көрсеткіші 8 пайызға өсіп, 97,5 пайызды құрады, — деді облыс әкімі.
Барлық білім беру ұйымдарында ерекше қажеттілігі бар балаларды инклюзивті оқыту үшін тиісті жағдай жасалған. Көп балалы және аз қамтылған отбасылардан шыққан балаларға жан-жақты қолдау көрсетілуде. Оларды мектепте тегін ыстық тамақпен, мектеп формасымен, аяқ киіммен қамтамасыз етуге облыстық бюджеттен 3,5 млрд теңге бөлінді.
— Студенттерді жұмыспен қамту мақсатындағы «Жас маман» жобасы аясында 11 құзыреттілік орталығы ашылды. Сондай-ақ бүгінде бюджеттік гранттар алған студенттер саны 65%-ға артты, — деді Даниал Ахметов.
Аталмыш бағыттағы жұмыстар алдағы уақыттарда да жалғаса бермек.
Азамат ЕРСАЙЫН,
«Семей таңы»
