Конституциялық реформа
РЕФЕРЕНДУМДЫ ҚОЛДАУ ШТАБЫ ҚҰРЫЛДЫ
Семей қаласында референдумды қоғамдық қолдау штабы құрылды. Штабқа жергілікті қоғам белсенділері, БАҚ және үкіметтік емес ұйымдардың өкілдері — жалпы саны 16 адам кіреді. Бұл туралы Семей қалалық ішкі саясат бөлімінің басшысы Олжас Соғымбай өзінің фейсбук әлеуметтік желісіндегі жеке парақшасында хабарлады.
Олжас Соғымбайдың айтуынша, штабтың алғашқы отырысы өтіп, атқарылатын жұмыс жоспары кең көлемде талқыланды. Алдағы уақытта бекітілген жұмыс жоспарына сәйкес штаб мүшелері қалада және ауылдық округтерде тұрғындармен кездесулер ұйымдастыратын болады.
— Әркімнің дауысы маңызды. Бәріміз азаматтық жауапкершілік танытып, республикалық референдумға қатысуымыз керек. Қатарымызда жастар, ардагерлер мен жергілікті журналистер қауымының өкілдері де бар, — дейді ол.
Қалалық штаб мүшелері күш біріктіріп, республикалық референдумға дайындық жұмыстарына көмектесуді жоспарлап отыр. Штаб мүшелері халықтың әр түрлі топтарымен кездесіп, конституциялық өзгерістерді, олардың Қазақстанның одан әрі дамуына қаншалықты әсер ететінін түсіндіретін болады.
Сөз орайында айта кетелік, республикалық референдумның нәтижесінде Конституцияның 33 бабы бойынша 56 өзгеріс енгізілмек. Егер оның әрқайсысын жеке сауал ретінде қарастырсақ, әр азаматқа жеке 56 бюллетень керек болады. Яғни әр азамат 56 бюллетеньді оқып, бөлек-бөлек дауыс беруіне тура келеді. Бюллетеньде 1 ғана сауалдың болу себебі Конституцияға енгізілетін өзгерістер бір-бірімен тығыз байланысты және ұқсас. Егер азамат бір өзгеріске қарсы шықса, ол екінші өзгеріске әсерін тигізеді. Ал енгізілмек өзгерістер бір-бірімен ұштасып жатыр. Егер референдумда 17 өңірдің 11-індегі халық жақтап дауыс берсе, Конституцияға өзгеріс енгізіледі.
Анар АХМЕТҚАЛИЕВА,
«Сем ей таңы»
