Жазылған жайдың жаңғырығы
«КӨГІЛДІР ОТЫН КӨПТІҢ ИГІЛІГІ…»
Газетіміздің өткен санында “Көгілдір отын көптің игілігі десек те…” деген тақырыпта Зайсан ауданындағы 8 ауылды көгілдір отынмен қамту жұмысының созылып кеткендігі, осы орайда бұған «Тарбағатай Мұнай» ЖШС тарапынан жер байлығын Қытай еліне экспорттауы кедергі болып жатқан жоқ па деген мәселе көтерілген болатын.
Бұдан бұрын хабарлағанымыздай, 11 мамыр күні Зайсан аудандық Мәдениет үйінде газ экспорты бойынша өткен жиынға ҚР Энергетика министрінің орынбасары Асхат Ғалымұлы Хасенов, ҚР Энергетика министрлігінің газ және мұнай-газ-химия департаменті директорының орынбасары Дәурен Тұрғанбайұлы Әбілхаиров, облыс әкімінің орынбасары Нұржан Сайлаубекұлы Жұмаділов, «Тарбағатай Мұнай» ЖШС-нің ресми өкілі Бекзат Уәлибекұлы Қалиев, ШҚО Энергетика және тұрғын үй-коммуналдық шаруашылық басқармасының басшысы Алмат Талғатұлы Ақышев, «ҚазАвтоЖол» ҰҚ» АҚ ШҚО филиалының директоры Асылбек Мұратұлы Нұғыманов арнайы келіп қатысты.
Облыстағы жалғыз газ өндіретін Сарыбұлақ кен орнында мамырдың басына дейін 3,5 млрд текше метр газ өндірілген. Тағы 1,5 млрд текше метр қор қалған. Осы уақытқа дейін өндірілген газдың 95 пайызын Қытай еліне сатқан. Жергілікті тұрғындар 8 жыл игерілген газдың 100 млн текше метрін қолданған.
2022 жылы газ экспорты тоқтатылған. Алайда Тарбағатай Мұнай компаниясы Үкіметтен тағы 150 млн текше метрді Қытайға экспорттауға рұқсат сұраған. Министрлік сұраудың жартысына рұқсат берген. Жақында қалған газ қайта экспорттала бастаған. Газ өндіруші компания өз әрекетін шығындарды жабу үшін қажет деп түсіндірді.
Жиын барысында тұрғындар тарапынан өз жеріміздің астынан шығып жатқан байлықтың Қытайға жөнелтілуін тоқтату мәселесі көтерілді. Бұл аудан тұрғындарын соңғы жылдары ерекше мазалап жүрген мәселелердің бірі болатын. Әсіресе көгілдір отынның игілігінен үміткер 8 ауылдың тұрғындарын алаңдатып отырған жағдайға байланысты аудан тұрғындары, қоғам белсенділері сұрақтарын қойып, өз пікірлерін ортаға салды.
Әрине, газ экспорты ел экономикасы үшін маңызды. Жиында “Тарбағатай Мұнай” компаниясы экспортты тоқтатқан жағдайда көгілдір отынның қорын дайындау кезінде қаржылық қиындықтар болатыны да айтылды. Жиналған қауым компанияға қарыздарынан өз бетінше құтылсын, газды экспорттауды тоқтатсын деп талап қойды.
Тұрғындардың талаптары жартылай қанағаттандырылып, газ экспорттау уақытша тоқтатылатын болды.
Ары қарай жергілікті комиссия шешеді.
«СТ» — ақпарат»
