МӘЖІЛІС ДЕПУТАТТАРЫ ЕЛ ІШІНДЕ
Өткен аптада Семей қаласына Парламент Мәжілісінің депутаттары Әмірхан Рахымжанов пен Жанат Омарбекова іссапармен келді. Қала әкімі Бақытжан Байахметов өңірге халықпен кездесу үшін келген депутаттарды қаланың әлеуметтік-экономикалық дамуымен таныстырып, ағымдағы жылға жоспарланып отырған жұмыстар туралы баяндады.
Депутаттардың жастармен кездесуі Шәкәрім университеті мен Alikhan Bokeikhan University-де өтті. Сондай-ақ Абай атындағы театрда Жанат Омарбекова театр ұжымымен және мәдениет саласының қызметкерлерімен жүздесті. Кездесулерде Парламент Мәжілісінің депутаттары Мемлекет басшысы ұсынған конституциялық өзгерістер мен алдағы референдумның маңыздылығын және оған қатысу жаңа Қазақстанды құруға бағытталған шара екенін атап өтті.
Жиында айтылғандай, ел Президенті ұсынған конституциялық өзгерістер республикалық референдумға шығарылады, яғни оларды қабылдау тікелей жалпыхалықтық дауыс беру арқылы жүзеге асырылады. Референдум сияқты демократиялық институтты қолдану, негізгі заңға түзетулер елдің болашағына айтарлықтай әсер етеді. Конституциялық реформа жалпыұлттық сипатқа ие. Ол жаңа мемлекеттік модельді құрады.
Өзара іс-қимылдың жаңа моделіне көшу Парламенттің қарқынды жұмысын, заң жобаларын жедел қарауды талап етеді. Мәжілісті қалыптастырудың аралас моделін енгізу, Парламенттің бақылау функцияларын кеңейту — осы және басқа да конституциялық өзгерістер Парламенттің рөлін едәуір күшейтіп, мәртебесін арттырады.
Ұсынылып отырған түзетулер азаматтардың конституциялық құқықтарын қорғау тетіктеріне қатысты болады. Азаматтардың, Бас прокурордың және адам құқықтары жөніндегі уәкілдің жүгіну мүмкіндігімен Конституциялық соттың құрылуы олардың құқықтары мен мүдделерінің сақталуын едәуір күшейтуге мүмкіндік береді.
Депутаттардың халықпен кездесулерінде басқа да мәселелер айтылды. Мысалы, мұқтаж жандарға көмек көрсетуде еріктілердің жетіспейтіні жайлы мәселе қозғалды. Бақытжан Байахметов өзінің орынбасарына бұл мәселені анықтап, волонтерлік қызмет жұмысын күшейтуді тапсырды. Кездесуге қатысушылар сондай-ақ Галето көшесінде демалуға арналған орынның жоқ екенін айтып, жақын жерден саябақ салуды ұсынды. Бұл мәселе алдағы уақытта қарастырылатын болды.
Қала тұрғындарымен кездесулерден кейін депутаттар AMANAT партиясы қалалық филиалының қоғамдық қабылдау бөлмесінде азаматтарды жеке қабылдады.
Мәжіліс депутаттары Әмірхан Рахымжанов пен Жанат Омарбекова Қарағайлы шағын ауданында болып, мүмкіндігі шектеулі балаларға арналған оңалту орталығының құрылыс жұмысымен танысты.
Семей қаласы әкімінің баспасөз қызметі
