Өткен аптаның соңында Семей қаласының әкімі Бақытжан Байахметов шаһардағы «Зооветинститут», «103-103А», «№3 аудандық қазандық», «5-интернат» қазандықтарына барып, жылыту маусымына дайындық пен ыстық су беру жұмыстарының барысын тексерді.
«Зооветинститут» қазандығын 14,1 Гкал/сағ қосымша бу қазандығын орнатумен қайта құру жоспарлануда. Жобалаушы — «Семипалатинскгражданпроект» өндірістік кооперативі. Құрылыс — монтаж жұмыстарының құны 1887,1 млн теңгені құрайды. Сараптама ағымдағы жылдың 31 мамырында дайын болады деп күтілуде. Бұл орайда батареялық циклонын ағымдағы жөндеуге қалалық бюджеттен 8 млн-ның үстінде ақшалай қаражат бөлінді. Жөндеу жұмыстары қыркүйек айында аяқталмақ.
Өткен жылы «AmirZhoba» ЖШС-мен шарт жасалды. Жоба шеңберінде жалпы қуаты 60 Гкал/сағ қазандықтарды орнатумен «103» қазандығын қайта жаңарту жоспарлануда. Сараптаманы алу мерзімі ағымдағы жылдың қыркүйек айы. Әзірлеуге конкурс өткізу үшін материалдар дайындалып, ұйымдастырушыға жіберілді.
Қалалық бюджеттен су жылытқыштарын ағымдағы жөндеуге арнайы қаражат бөлінді. Жұмыстар алдағы айда басталмақ.
«Шығыс Қазақстан облысы Семей қаласының «Теплокоммунэнерго» МКК РК-3 турбогенератор орнатумен 130 Гкал/сағатқа кеңейту» ТЭН әзірленуде. Мердігер ұйым — Нұр-Сұлтан қаласы «Жол көлік кешенінің басшы қызметкерлерінің біліктілігін арттыру институты» ЖШС. Шартты орындау мерзімі – биылғы жылдың желтоқсан айы.
«ШҚО Семей қаласындағы «Теплокоммунэнерго» МКК РК-3 қайта жаңарту» жобасы құрылысының үшінші кезегі түзетілуде.
Мердігер ұйым «Азияэнергопроектмонтаж» ЖШС. Қалалық бюджеттен ағымдағы жөндеуге жалпы сомасы 55 305,898 мың теңге ақшалай қаражат бөлінді. Жұмыстар алдағы маусым айының алғашқы күндері басталады деп күтілуде. Күз түскенге дейін аяқтап үлгеру қажет.
Сондай-ақ «5-интернат» қазандығын жөндеу де жоспарлануда. Қалалық бюджеттен ағымдағы жөндеуге жалпы сомасы 6 646,596 мың теңге ақшалай қаражат бөлінді.
Жұмыстар алдағы маусым айында басталып, қыркүйектің алғашқы жұлдызында аяқталады деп көзделуде. Бұл жұмыстардың барлығы да қала әкімі Бақытжан Байахметовтің тікелей қадағалауында болады.
Ерлан АЙҚЫНҰЛЫ,
«Семей таңы»
