Семей қаласында өткен аптадағы айтулы оқиғалар қатарында облыстық, аудандық ардагерлер кеңестерінің өкілдерінің келуі. Қала әкімінің орынбасары Зәуреш Исабаева ардагерлерге бірқатар мәдени нысандарды аралатып, таныстырды. Ардагерлер қауымы алдымен №30 мектепте ашылған Назарбаев кабинетінде болып, жас тимуршылар отрядының мүшелерімен кездесті. Сондай-ақ, Жеңіс саябағы мен Ерлік даңқы мұражайында болып, Қарттар үйіндегі күндізгі стационардың жұмысымен танысып, облыстық ардагерлер кеңесі президиумының көшпелі отырысын өткізді.
Ардагерлер кеңесі мүшелерінің сапары Семейдегі №30 мектепке барып, білім ордасындағы патриоттық тәрбие жұмыстарының барысымен танысудан басталды. Білім ошағының басшылығымен кездесу кезінде мұнда арнайы іздестіру отряды мен тимуршылар отрядының құрылғаны мәлім болды. Сондай-ақ, осы мектептің маңында тұратын ардагерлердің назардан тыс қалмайтыны айтылды. Мәселен, білім ошағының оқушылары ерікті түрде майдангерлер мен тыл еңбеккерлерінің әртүрлі шаруаларына қолғабыс етіп, мейрам күндері құттықтап тұруды дәстүрге айналдырған. Мектеп басшылығымен әңгіме барысында ардагерлер атқарылып жатқан жұмыстарға ризашылықтарын білдіріп, патриоттық тәрбие бағытындағы шараларды үздіксіз жүргізе беру керектігін айтты.
Сондай-ақ, ардагерлер мектеп қабырғасында ашылған ерлік және даңқ мұражайын да аралап көрді. Мұнда жауынгерлердің жазған хаттары, қару-жарақтардың түрлері, екінші дүниежүзілік соғыс кезінде болған ұрыстардың көріністері салынған суреттер мен еліміздің батырлары жасаған ерліктері турасында хабар беретін құжаттар мен жазба материалдар тағы да басқа құнды жәдігерлер қойылған. Ұстаздар мен оқушылар тобынан құралған экскурсия жүргізушілері қала әкімінің орынбасары Зәуреш Исабаева мен ардагерлерге мұражайдың жұмысы мен онда қойылған заттардың тарихы, Жанғазы Молдағалиев сияқты қаһарман аталарымыздың майдан даласында көрсеткен батырлығы туралы ақпарат берді. Содан кейін ардагерлер мектептегі Назарбаев кабинетіне барып, екінші дүниежүзілік соғыстың себептері мен салдары туралы айтылған ерлік сабағын көріп, оқушылардың білімділігі мен ойларының ұшқырлығына тәнті болды.
{jcomments on}Бұдан кейін бекітілген бағдарламаға сәйкес ардагерлер Жеңіс саябағына барды. Тыл еңбеккері Рашида Хасанова меймандарды саябақтың құрылу тарихымен, батырлардың құрметіне орнатылған тастар мен ескерткіш мүсін жайлы айтып, кең көлемде мағлұмат берді.
— Бұл саябақ жергілікті ардагерлер ұйымының бастамасымен 1985 жылы жеңістің 40 жылдығына орай ашылған. Алғашында атқа мініп жеңіс туралы қуанышты хабарды елге таратып келе жатқан қыздың, ананың, қарындастың әрқалай түсінуге болады, яғни, әйел адамның бейнесі берілген мүсін орнатылды. Мына, құлпытастар кейіннен қойылды,- деді Рашида Ашрафқызы. Содан кейін ардагерлер саябақтағы мәңгілік алауға салтанатты түрде гүл шоқтарын қойып, батырлардың рухына тағзым етті.
Сонымен қатар, ардагерлер тарихи – өлкетану музейінің әскери даңқ бөлімшесін де айналып өтпеді. Мұнда Сансызбай Құлтуманов мейман- дарға екінші дүниежүзілік соғыс кезінде ерен ерлік көрсетіп, Кеңес Одағының батыры атағының, “Даңқ” орденінің үш дәрежесінің толық иегері атанған семейлік жауынгерлер туралы мағлұмат берді. Сондай-ақ, ол осында орналасқан жәдігерлер мен материалдардың тарихымен таныстырып, мұражайдың құрылуына атсалысқан жандардың аттарын ерекше ілтипатпен атап өтіп, оларға деген алғысының шексіз екенін жеткізді. Мұражайға ерекше көңіл бөліп қолдау көрсетіп келе жатқан қала басшылығына да ризашылығын білдірді.
Сапар соңында ардагерлер қауымы қарттар үйіне барып, күндізгі стационардың жұмысымен танысты. Содан соң облыстық ардагерлер кеңесінің төрағасы Леонид Бердюгин бастаған майдангерлер мен тыл еңбеккерлері облыстық ардагерлер кеңесі президиумының көшпелі отырысын өткізді. Жиын барысында өткен Жеңіс күнімен құттықтау айтылып, келесі жылы аталып өтілетін Жеңістің 70 жылдық мерейтойын тойлау жоспары сөз болды.
Мирас ҚҰСАЙЫН,
«Семей таңы»
