Бүгінгі таңда Семей қаласында ауыл шаруашылығы саласында 8 инвестициялық жоба нақты іске асырылуда. Бұл туралы жуырда Аймақтық коммуникациялар қызметінде өткен баспасөз мәслихатында қалалық ауыл шаруашылығы бөлімінің басшысы Нұрлан Шақабаев мәлім етті.
Осындай ауқымды жобалардың бірі 913 гектар суармалы егістік алқабына суару жүйесін орнату болып отыр. Бұл мақсатта бюджеттен жалпы көлемі 288,4 млн теңге бөлінді. Жоба 2023 жылы аяқталады деп жоспарланып отыр.
— Жалпы, қала бойынша 8 инвестициялық жоба іске асырылуда. Бұл — майлы дақылдарды, астық, мал азықтық дақылдарды, асыл тұқымды мал өсіру және жұмыртқа өндіруге қатысты жобалар. Осы жобалардың нәтижесінде егіс алқаптары ұлғаяды, 414 тонна арпа, 650 тонна жем-шөп алынады. Сондай-ақ 660 тонна күнбағыс тұқымы алынып, май зауытына тапсырылады. Бұдан бөлек, құрылысы жүргізіліп жатқан 200 басқа арналған сүт-тауарлы фермасын құнарлы мал азығымен қамтамасыз ету мәселесі шешіледі, — деді бұл орайда Нұрлан Шақабаев.
Келер жылы, ферма салынып біткеннен кейін, 1000 тоннаға дейін сүт өндіріліп, жаңа жұмыс орындары ашылады деп жоспарлап отыр.
Динара НҰРЛЫБЕКҚЫЗЫ,
«Семей таңы»
