Семей қаласының әкімі Бақытжан Байахметов Приречный ауылдық округіндегі көктемгі егіс жұмыстарының барысымен танысты.
Округтегі ең ірі ауыл шаруашылық тауарын өндіруші — «Агрофирма Приречное» ЖШС. Биылғы жылы компания егіс алқаптарының құрылымын бірнеше есе кеңейтті. Мәселен, өткен жылы дәнді дақылдар 309 гектар аумаққа егілген болса, биыл олардың ауданы 162 пайызға өсіп, 500 гектарды құрады.
Картоп егу 150 пайызға өсіп, 309 гектар аумақты құрады. Қырыққабат, сәбіз және мал азықтық дақылдар көбірек егілді.
— Бұл кәсіпорынның тарихы тереңде жатыр және қазіргі заманға сай жұмыс істеп келеді. Сұранысты ескере отырып, бұл жерде қаламыздың және өңірдің тұрғындарына қажетті дақылдар егістігі кеңеюде. Қазіргі таңда біз қаланың астық пен ұнға деген қажеттілігін толығымен қамтып отырмыз, енді картоп та өзімізде өсірілуі тиіс, — деп атап өтті Бақытжан Байахметов.
Семей қаласы әкімінің айтуынша, азық-түлік қауіпсіздігі үшін көкөніс дақылдары көлемін ұлғайту маңызды. Қазіргі таңда көкөністерге деген ішкі қажеттіліктер 50-70 пайызды қамтып отыр. Шаруа қожалықтарына жүйелі негізде қолдау көрсету қажет.
— Бірінші кезекте, инфрақұрылымды ретке келтіру маңызды. Біз арнайы мемлекеттік бағдарламалар арқылы инвесторлар тартуды, сондай-ақ ауылдық өндірістік кооперативтерге қолдау көрсетуді жоспарлап отырмыз. Өткен жылы Семей қаласындағы шаруа қожалықтарының иелеріне 2 миллиард теңгеден астам сомаға қайтарымсыз субсидиялар берілді. Биылғы жылы мемлекет тек ақшамен ғана емес, тағы басқа да қажетті қолдау көрсетуді жалғастырады.
Мысалы, Семейдегі май экстракциялық зауыты шаруа қожалықтарының өнімін қабылдай алады. Олар өнімін өткізу үшін нарықты алыстан іздемейді, — деді Бақытжан Байахметов.
«Приречное Агрофирмасы» — қаланың көкөніс қоймаларына көкөністерді төмен, белгіленген бағамен тұрақты жеткізетін санаулы кәсіпорындардың бірі. Өткен жылы кәсіпорын үш мың тоннадан астам әр түрлі ауыл шаруашылық өнімдерін, оның ішінде картопты келісін 82 теңгеден жеткізді. Биыл агрофирма әлеуметтік бағамен көкөніс жеткізуді үш жарым мың тоннаға дейін арттыруды жоспарлап отыр.
Семей қаласының әкімі асыл тұқымды репродукторды кеңейту жөніндегі инвестициялық жобамен де танысты. Оны іске асыру мерзімі 2025 жылға жоспарланып отыр. Жобаның құны 150,0 млн теңгені құрайды.
Агрофирма қазақтың ақбас тұқымды ірі қара малын өсіретін асыл тұқымды мал зауыты мәртебесіне ие. Кәсіпорынға 42169,2 гектар ауыл шаруашылығы алқаптары бекітілген. Мал азығы базасы асыл тұқымды мал басын азықпен толықтай қамтамасыз етуге мүмкіндік береді. Бүгінде шаруашылықта үш мыңнан астам асыл тұқымды мал басы бар.
Осы инвестициялық жобаны іске асырғаннан кейін мал басы көбейіп, сапалы элиталық ет өнімдері өндіріледі және жыл сайын жалпы салмағы 130 тонна асыл тұқымды 500 мал басы 232,2 млн теңгеге саудаланатын болады деп күтілуде.
Семей қаласы әкімінің баспасөз қызметі
