Еңбек және халықты әлеуметтік қорғау министрі Тамара Дүйсенова әйелдердің зейнет жасын төмендету мәселесі қай деңгейде қаралып жатқаны туралы айтты. Сөзінше, қазір белсенділер мен министрлік өз ұсыныстарын енгізген, деп хабарлайды Семей таңы ақпарат агенттігі Sputnik Қазақстанға сілтеме жасап.
«Біздің ұсыныстар белсенділерге де ұнады, сондықтан жұмыс тобымен бірге есептеп жатырмыз. Әр әлеуметтік қолдауға қаржы керек екенін білесіздер. Біз үзіліс алып, есеп жүргізген, тиімді нұсқаны таңдайтынымызды айттық. Нақтыланған соң ақпарат береміз», – деді Тамара Дүйсенова сенат кулуарында.
Тамара Дүйсенова әйелдерден бөлек тағы қай азаматтар категориясының зейнет жасы төмендейтінін айтты. Сөзінше, жинағы жетсе, кез келген азамат 50 жастан кейін зейнетке шыға алады.
«Қазіргі заңда азаматтардың 50 жастан кейін де зейнетке шыға алауы қарастырылған. Алайда зейнет жинағына қатысты сұрақтар бар. Біз бұларды қарастырып жатырмыз», – деп нақтылады министр.
Айта кетейік, бұған дейін Нақтыланған республикалық бюджет туралы заңға президент қол қойғаннан кейін, зейнетақы мен жәрдемақы мөлшері қосымша 4%-ке индексацияланатыны туралы хабарлаған едік.
