Референдумда Ата Заңымызға енгізілетін өзгерістер мен толықтырулар Жаңа Қазақстанның негізін қалайтын бас құжат екендігін әр қазақстандық түсінуі керек. Референдум – халықтың таңдауы, қазақ елі үшін жасалып отырған жаңа қадам.
Бұл — билікті халықтың қолына қайтару.
Бұл — әлеуметтік тұрақтылыққа бастайтын жаңа мүмкіндік.
Республикалық референдумға Семейдегі шығармашылық қауым өкілдері де бір кісідей атсалысып, қолдау білдіруге әзір. Ата Заңымыздың 33 бабына, яғни үштен бір бөлігіне енгізілетін өзгерістер мен толықтырулар қазіргі транформация кезеңінен өтіп жатқан қоғамға бағдарланып отыр. Ендеше, осы ортақ істен шет қалмай, өзіміздің азаматтық ұстанымымызды көрсетуіміз керек
Бірқатар билік өкілеттілігін қайта бөлу мемлекетті басқаруда халықтың үлесін арттыруға жол ашады. Бұл өзгерістер бойынша жеке тұлғалардың, азаматтардың ойы, пікірі ерекше назарға алынатын жаңа мемлекеттік жүйе құрылайын деп жатыр.
Референдум мемлекет пен қоғам қатынасында тиімді құқықтық негіз қалыптастыратыны сөзсіз. Әділетті Қазақстанды құруға республиканың әрбір тұрғыны атсалысуы қажет деп ойлаймын.
Ардақты ағайын! Жаңа Қазақстанның жаңа тарихын бірге жазатын, бірге шешім қабылдайтын, бірге талқылайтын сәт келді. Сондықтан референдумға бәріміз бір адамдай белсенді түрде қатысып, азаматтық позициямызды білдірейік, Қазақстан Республикасының Ата Заңын бірге жасап, бірге жазайық !
Мерей ҚАРТ,
ақын, Мемлекеттік «Дарын» жастар сыйлығының иегері
