Жуырда Еуропа қайта құру және даму банкімен ынтымақтастық шеңберінде «Жасыл қалалар» бағдарламасын іске асыру жоспарын жасауға көмек көрсету үшін халықаралық консультанттар Семей қаласына жұмыс сапарымен келді.
Бұл жоба Семей шаһары үшін өте маңызды, өйткені ол ұзақ уақытқа созылған және әр түрлі себептермен толық шешілмеген бірқатар ауқымды мәселелердің шешімін табуға көмектеседі. Бұл тек көгалдандыру ғана емес, жалпы алғанда, Семей тұрғындары үшін жайлы өмір сүру ортасын құру – экология, сумен жабдықтау және су бұру, энергетика және жылумен жабдықтау, тұрмыстық қалдықтар, саябақ аймақтарын құру, ғимараттардың құрылысы, сондай-ақ көлік пен инфрақұрылымға қатысты барлық мәселелерді қамтитын болады.
Айта кетерлігі, Семей мен Өскемен қалалары аталмыш бағдарламаға 2020 жылы қосылды, қазір жоспар құрудың белсенді кезеңі басталды. Ол үшін 19 және 20 мамыр күндері Абай атындағы кітапханада аталған тақырыптар бойынша ұсыныстарды белсенді талқылау және жинау өткізілді. Сессияларға үкіметтік емес ұйымдардың, қоғамдық кеңестің, қалалық мәслихаттың, әкімдіктің салалық бөлімдерінің өкілдері, сондай-ақ азаматтық белсенділер қатысты.
— Біз еуропалық әріптестерімізбен әрдайым тығыз ынтымақтастыққа және семейліктердің өмірін барынша қолайлы ету үшін олардың жинақтаған тәжірибесін алуға дайынбыз. Жұмыс сессияларының қорытындылары алдағы кездесуде жарияланады. Онда «Жасыл қалалар» бағдарламасын іске асыру үшін алдын ала жұмыс жоспары ұсынылады, — деп жазды өзінің фейсбук әлеуметтік желісіндегі жеке парақшасында қала әкімі Бақытжан Кәкенқажыұлы.
Әлібек КЕМЕЛХАН,
«Семей таңы»
