Қазақстанда үстіміздегі жылдың 5 маусымы күні өтетін бүкілхалықтық референдум — еліміздің тарих күнтізбесін толықтыратын тағы бір жаңа асу. Ата Заңымызға енгізілетін өзгерістер мен толықтырулар халықтың талқысына шығарылып, бүкіл республика тұрғындарының пікіріне негізделіп қабылданғалы отыр. Референдумда елдің болашағы үшін дауыс береміз.
Жауапты сәтте еліміздің әр азаматының саналы таңдау жасау мүмкіндігі бар. 1995 жылғы референдумда жас мемлекетіміздің негізгі заңы үшін дауыс бергеніміз есімде. Ата Заңдағы содан кейінгі жылдарғы түзетулер біздің қатысуымызсыз, тек Парламент қабырғасында қабылданды. Бұл референдумда біз елдің болашағы үшін таңдау жасаймыз. Бұл саяси маңызы зор оқиғада халықтың даусы шешуші рөл атқарады .
Мемлекет басшысы Қасым-Жомарт Тоқаевтың жалпыұлттық референдум өткізу туралы шешімі – халыққа деген жоғары сенімнің белгісі, мемлекетіміздің шын мәнінде «халық үніне құлақ асатын үкімет» болуға ұмтылып отырғандығының айқын айғағы. Қоғамдағы қордаланған проблемалар мен қажеттіліктермен бірге мемлекет үшін маңызды мәселелердің шешілуіне әр қазақстандықтың үлесін қосуы қажет.
Мен өнер саласының өкілі болғандықтан халық арасында жиі боламын. Халықтың референдумға қатысты пікірі дұрыс екендігін көріп те, естіп те жүрмін. Ата Заңымызға қатысты бүкілхалықтық талдауға ұсынылған түзетулер мен толықтырулар Жаңа Қазақстанның жаңарған моделін жасауға бағытталғаны байқалады. Мысалы, енді Парламент Мәжілісі мен облыстық мәслихаттар депутаттарының үштен бірін біз тікелей дауыс беру арқылы сайлай алатын боламыз. Сондай-ақ адам құқықтарын қорғауды күшейтуге қатысты түзетулер де өте маңызды.
Бесінші маусымда еліміздің әр тұрғыны референдумға барып, Қазақстанның болашағына дауыс беруден тыс қалмауы керек деп ойлаймын.
Мафруза УТУЛЕНОВА,
әнші, Қазақстанның еңбек сіңірген қайраткері
