Семей қаласы әкімдігінде Қоғамдық кеңес отырысы өтті.
Қоғамдық кеңестің қазіргі құрамында үкіметтік емес ұйымдардың, бұқаралық ақпарат құралдарының өкілдері мен қоғам белсенділері және басқа да қаланың белгілі азаматтары – барлығы 21 адам бар. Бұрын кеңес құрамында 13 адам болса, қазір айтарлықтай кеңейіп, 80 пайызға жаңарған. Заңнамаға сәйкес, қоғамдық кеңес мүшелері 2 реттен артық сайлана алмайды.
Жиында Қоғамдық кеңес төрағасы Шаған Жұмақсанов атқарылған жұмыстар туралы хабарлама жасады. Кеңес төрағасының айтуынша, қазіргі құрамдағы кеңес ұйымдастыру мәселелерін талқылау үшін бірнеше рет отырыс өткізген. 2022 жылға арналған жұмыс жоспары бекітіліп, өндірістік, бюджеттік, әлеуметтік және сыбайлас жемқорлыққа қарсы 4 комиссия құрылды. Кеңес мүшелері сондай-ақ әлеуметтік маңызы бар тауарлар бағаларын және жол жөндеу жұмыстарын бақылау шараларына белсенді қатысты.
Кеңес отырысында Семей қаласының әкімі Бақытжан Байахметов бюджет қаражатын тиімді пайдалану және сыбайлас жемқорлық тәуекелдеріне жол бермеу үшін қоғамдық бақылаудың маңыздылығын ерекше атап өтті.
— Қоғамдық кеңестің құрамына лайықты, беделді тұлғалар сайланды, олардың әрқайсысы нақты саладағы кәсіби мамандар. Сіздердің білімдеріңіз, тәжірибелеріңіз кеңес алдында тұрған міндеттерді жүзеге асыруға мүмкіндік береді. Семей қаласының бюджетіндегі қаражат едәуір ұлғайды, оның дұрыс, тиімді жұмсалуы үшін қоғамдық бақылау қажет, — деді Бақытжан Байахметов.
Қала басшысы жер телімдерін бөлуде және жол құрылысында сыбайлас жемқорлық көріністерінің алдын алу қажеттігін, сондай-ақ жерді өздігінен иемденіп алуға, бейберекет құрылыс салуға жол берілмеуі керектігін ерекше атап өтті.
— Қандай да бір рұқсат құжаттарынсыз көп пәтерлі үйлер салу жағдайлары болды. Біз көшелердің белгілі бір учаскелерін кеңейте алмаймыз, өйткені ол жерлерде кейбір коммерциялық нысандар салынып, тіпті жолды жауып тастаған жағдайлар да кездесті. Біз кәсіпкерлікті дамытуға қарсы емеспіз, бірақ бәрі заң талаптарына сәйкес болуы керек, — деді қала әкімі.
Бақытжан Баяхметовтің айтуынша, жол жөндеу, көшелерді тазарту жұмыстары сапасыз жүргізілген жағдайда қоғам өкілдері шаралар қолдануы тиіс. Жауапсыз мердігерлердің жетегінде кетпей, қажет болған жағдайда, оларға өз міндеттерін тиісті деңгейде орындату маңызды.
Қала басшысы шаһардың сәулеттік келбеті, үйлердің қасбеттерін жөндеу, қазандықтар мен басқа да жылу көздерінің қуатын арттыру, су құбырларын жүргізуге қатысты жоспарланған жұмыстардан хабардар етті. Бақытжан Кәкенқажыұлы осы жобалардың барлығына көлемді қаражат бөлінетінін, оларды жүзеге асыру барысында да, аяқталғаннан кейін де Қоғамдық кеңестің бақылауын күшейту қажеттігін айтты.
Естеріңізге сала кетейік, Заңға сәйкес, Қоғамдық кеңес дегеніміз – министрліктер, Қазақстан Республикасының Президентіне тікелей бағынатын және есеп беретін органдар, жергілікті мемлекеттік басқару органдары, квазимемлекеттік сектор субъектілері құратын консультативтік-кеңесші, бақылаушы орган.
Қоғамдық кеңестер қызметінің мақсаты – қоғамдық маңызы бар мәселелер бойынша азаматтық қоғамның пікірін білдіру. Қоғамдық кеңестердің ұсынымдары заңнамада көзделген шешімдерді қабылдайтын және уәжді жауаптар беретін мемлекеттік органдардың, квазимемлекеттік сектор субъектілерінің қарауы үшін міндетті болып табылады.
Данара НҰЛЫБЕКҚЫЗЫ,
«Семей таңы»
