«Жасыл ел» — 2005 жылдан бастап жүзеге асырылып келе жатқан кешенді бағдарлама. Бүгінгі күні бұл жоба жастар үшін патриоттық мектепке айналып отыр. Бағдарламаның негiзгi мақсаты — жастардың күшiмен елiмiздi көгалдандыру, елді мекендерді жасыл желекпен көмкеру, көркейту, сонымен қатар жастардың Отанға, жерге, табиғатқа деген сүйіспеншілігін, патриоттық сезiмдерiн дамыту. Бағдарламаның тағы бір тиімді тұсы — жастарды еңбекке баулу.
Өткен сенбі, 28 мамыр күні Семей қаласында «Жасыл ел» еңбек жасақтарының XVIII маусымының ашылу салтанаты өтті. Іс-шараға Семей қаласы әкімінің орынбасары Айдар Садырбаев, AMANAT партиясының атқарушы хатшысы Арайлым Есімбекова, «Зеленстрой» ЖШС директорының орынбасары Мұратхан Скенов, «Жасыл ел» еңбек жасағының жетекшісі Мақсат Карибаев, облыстық Жастар ресурстық орталығының директоры Данияр Жүнісов және «Жасыл ел» еңбек жасақтарының белсенділері қатысты.
— «Жасыл ел» — жастарды еңбексүйгіштікке, адал еңбек етуге шақырады. Мысалы, жасақтың Семей орманы резерватында жаз бойы істеген еңбегінің нәтижесі күзде көрінеді. Мұның өзі еңбекке баулудың бір көрінісі. Бұл жасақта болған қаншама жас бастама көтеріп, биік мінберлерден сөз сөйлеп, қатарластарын өзінің артынан ерте алатындай дәрежеге жетті,- деді Айдар Серікқазыұлы.
Қала әкімінің орынбасары сонымен қатар бұл шараның Шәкәрім университеті шаңырағында өтуінің де өзіндік мәні бар екендігін атап өтті. Жасақ құрамында болған осы білім ордасының белсенді студенттері көшбасшы атанып, бірнеше мәрте республикалық деңгейде жүлделі орындарға ие болған.
Салтанатты шарада сөз алған AMANAT партиясының атқарушы хатшысы Арайлым Есімбекова рухани тұрғыда ғана емес, материалдық жағынан да бұл бағдарламның пайдасы зор екендігіне тоқталды:
— «Жасыл ел» жасақтарында көптеген мүмкіндігі шектеулі, көп балалы, аз қамтылған отбасылардан шыққан жастар, істі болған азаматтар да жұмыс істейді. Жастар жазғы маусымда еңбек етіп, отбасына көмектесуге мүмкіндік алады. «Жасыл ел» жастарға жасалған үлкен мүмкіндік деп санаймын,- деді ол.
Қаланы абаттандырумен айналысатын «Зеленстрой» ЖШС директорының орынбасары Мұратхан Сәкенов белсенді жастарды жұмысқа шақырды. Жұмысқа орналасқан жастар бағдарлама шеңберінде қаланы көркейтуге атсалысады.
Былтырғы жылы «Үздік отряд командирі» номинациясының жеңімпазы атанған Абай аудандық «Жасыл ел» жасағының өкілі Нұрасыл Кенжеғалиұлы жұмыстың қиындығы мен қызығы қатар жүретінін айта келіп, өз жасағының жетістіктерін мақтанышпен жеткізді. Ол «Жасыл ел» жасағының атқарған жұмысын жастардың қоғамға қосқан үлесі деп санайды.
Айта кетейік, биылғы маусымда облыс бойынша 1200 жас жұмыспен қамтылмақ. Бұрын жасылелдіктердің жалақысы 50-60 мың теңге болса, ағымдағы жылы 90-95 мың теңгеге көтерілген. Еңбек маусымының соңында дәстүрлі түрде 10 аталым бойынша үздіктер марапатталатын болады. Облысымыз «Онлайн штаб» және «Жыл серпіні» аталымдары бойынша екі жыл қатарынан республикада дараланып, жеңімпаз атанған.
Жалынды жастардың басын қосқан тағылымды шара соңы Шәкәрім университеті студенттерінің концертіне ұласты.
«Жасыл ел» бағдарламасы аясында жастардың күшімен 17 жылда сан мыңдаған ағаш отырғызылды, қала, ауыл-аймақ жасыл желекке оранды.
«Жасыл елдің» XVIII маусымында еңбек ететін жастардың ісіне сәттілік тілейміз!
Мерей СЕЙІЛХАНОВА,
Шәкәрім университеті студенті
