Өткен бейсенбі күні Семейдің орталық алаңында республикалық бірыңғай «Жас Ұлан» балалар мен жасөспірімдер ұйымының ІІ қалалық жиыны өтті. Салтанатты шараны білім бөлімінің қолдауымен «Жас жұлдыз» балалар орталығы ұйымдастырды.
Ұйым Елбасының бастамасы бойынша құрылған ҚР балалар мен жасөспірімдердің қоғамдық ұйымы болып табылады. «Жас Ұлан» — өскелең ұрпақты жоғары рухани-адамгершілік құндылықтар, гуманистік толеранттылық пен демократиялық ұстанымдарға негізделген қазақстандық патриотизм рухына қалыптастырады. Осындай бағдары айқын ұйымның жұмысы Семей шаһарында 2011 жылы өз жұмысын бастады. Бүгінде құрамында қаламыздың 5510 озат оқушысы бар. Ұйым жұмысын қадағалап, бастамашы болатын қалалық ұланбасылар Кеңесі де жұмыс істеуде.
Дәстүрлі түрде өткізілетін шараның мақсаты – ұландарды отансүйгіштікке тәрбиелеп, ұлттық құндылықтарымызды бағалауға баулу. Сонымен қатар, білімді, тәрбиелі оқушылар арасында «Жас Ұлан» қатарына ену мәртебесінің биіктігін түсіндіру. Қалалық білім бөлімі тәрбие секторының меңгерушісі Сәуле Абдуллақызы ел ертеңі болар ұлтжанды ұрпақ тәрбиелеуде ұйымның алар өзіндік орыны болуға тиіс екенін айтады.
-«Жас Ұлан» — салауатты өмір салтын ұстанған, білімді де тәрбиелі қазақстандықтардың ұйымы. Жасұландық оқушылар “өте жақсы” деген бағаға оқиды, қоғамдық жұмыстарға белсене араласып, үлкенге ізеттілік, кішіге қамқорлық көрсетеді. Ол — өз Отанының патриоты, ел ертеңі болар азамат. Бүгін алаңда дәл сондай ұландар бас қосып отыр»,- деп ұйымның арқалайтын жүгінің ауыр, беделінің биік, жауапкершіліктің үлкен екендігін Сәуле Абдуллақызы айтып өтті.
Салтанатты жиында белсенді оқушылар патриоттық әндер шырқап, көк туымызды көкте желбіретті. Дамуға бастайтын даңғыл жол – «Мәңгілік Ел» идеясын шараның өзегі етіп, алуан түрлі көріністер көрсетті. Жиынның екінші «Тулар бойынша сапқа тұр» бөлімінде ту топтары арасында сайыс өтіп, 360 жасұландық бақ сынасты.
{jcomments on}«Жас Ұлан» ұйымының ІІ қалалық жиыны үш күнге созылды. Екінші күні топ көшбасшылары арасында «Бірлігіміз жарасқан» атты қалалық сайыс өтсе, соңғы күні жағалауда «Алға, Жас Ұлан!» спартакиадасы, «Жаттығу» флеш-мобымен жалғасты.
Шара қорытындысында 350 жасұландықтың қатысуымен Балалар мен жастардың шығармашылық сарайында мерекелік бағдарлама және марапаттау рәсімі өтті.
Ту ұстап, мектептерінің атын қорғауға келген оқушылар ұландар қатарында болғандықтарын мақтан тұтады. Олардың айтуынша, мұнда бос уақытты тиімді өткізуге, түрлі үйірмелерге баруға мүмкіндік бар. Ең бастысы, бас қосқан білімді өрендер өрелі ойларын ортаға салып, пікір алмаса алады.
Әйгерім Сәрсенғали,
«Семей таңы»
