Семей қаласының Абай атындағы музыкалық-драма театрында Шәкәрім университетінің 100 үздік студентін марапаттауға арналған салтанатты кеш өтті. Білім, ғылым, спорт және қоғамдық бағыттар бойынша жоғары нәтиже көрсеткен Шәкәрім университетінің 100 студенті марапатталды.
Салтанатты шара шымылдығын ашқан Басқарма төрағасы — ректор Бауржан Ердембеков:
— «Үздік 100 студент» жобасы – еліміздегі ауқымды жоба. Университетімізде күндізгі бөлімде 5000-ға жуық студент болса, солардың басым көпшілігі жобаға қатысты. Факультеттер арасындағы белсенділік бойынша ветеринария және агроменеджмент факультеті көш басында тұр. Жыл бойы білім ордасындағы барлық шараларға белсене қатысқан білімді, тәрбиелі, кешегі күні Мағжан сенген жастарға құрмет көрсетпекпіз. Осы жастар Абай облысының іргетасын қалайтын болады. Жаңа облысымызды осы жастарымыздың күшімен құруымыз керек, облыс болдық деп бос даурықпай, әлеуметтік-экономикалық тұрғыда өркендеген өңірлерді қуып жетуіміз керек. Шәкәрімнің осындай жастары тұрғанда Абай облысын құру бізге оңайға түседі. «Жүзден жүйрік, мыңнан тұлпар» шыққан студенттеріміз болашақта да үлкен жетістіктерге жететіндігіне сенімдімін,- деді.
Бауыржан Амангелдіұлы бұл шараның «атам театры» саналатын Абай театрында өтуінің де өзіндік мәні бар екенін, жастар киелі сахнаның құдіретін, қадірін түсінуі керектігін де айтып өтті.
Айта кестек, жоба аясында бірнеше мың студент top100.shakarim.kz сайтына тіркеліп, өз жетістіктерімен бөлісті. Оқу жылының соңында диагностикалау жүйесінде академиялық, ғылыми-зерттеу, шығармашылық және спорт бағыттары бойынша статистика дайындалып, оқ бойы озық шыққан даралар анықталды. Мыңнан тұлпар шыққан жүз қатысушыға сахна төрінде құрмет көрсетіліп, ТОП-20 студент “Үздік студент” төсбелгісімен марапатталды. Университеттің ең белсенді білім алушысы Нұрбол Сүлейменов жүз мың теңге көлемінде қаржылай сыйлық, арнайы алғыс хат пен “Үздік студент” төсбелгісіне ие болды. Сонымен бірге дарындыларға Шәкәрім шаңырағы серіктестері де сый-құрмет көрсетті. Зейнолла Сәнік атындағы қоғамдық қор — 10, республикалық QazBilim орталығы — 5, “Qalam” жобасы 5 шәкіртақыға демеуші болды.
Кеш барысында ағымдағы жылы Шәкәрім университетінде ашылған 12 жаңа мамандандырылған дәрісхана, зертханалар бейнесюжет арқылы таныстырылды.
Үздік студенттердің құрметіне республикалық өнер байқауларының жеңімпаздары әуезді әндері мен “Wasabi”, “Virus” би топтары тамаша билерін тарту етті.
Жасмина БЕРЕКБОЛОВА,
Шәкәрім университеті студенті
