Өткен аптада Семей өңірі бойынша коронавирус инфекциясына қарсы вакцинаның төртінші дозасымен қайта вакциналау бастау алды.
Жалпы, қала бойынша 37 234 адам ревакцинациялануға жатады. Бүгінгі күнге дейін өңірімізде ревакцинациядан 453 адам өткен. Бұл туралы Семей қаласының аймақтық коммуникациялар қызметінде өткен баспасөз конференциясында эпидемиологиялық бақылау бөлімінің басшысы Шолпан Садықова айтып берді.
— 23 мамырда бас мемлекеттік санитарлық дәрігер 2022 жылғы 13 қаңтардағы Қаулыға өзгерістер енгізді. Жаңартылған Қаулыға сәйкес, барлық қазақстандықтар, сондай-ақ Қазақстан аумағында 3 ай және одан да көп уақыт тұратын шетелдік азаматтар КВИ-ға қарсы ревакцинациялауға жатады. Қайта ревакцинациядан коронавирустық инфекцияны жұқтыру қаупі жоғары адамдар – медицина қызметкерлері, медициналық-әлеуметтік мекемелердің контингенті және персоналы, күштік құрылымның қызметкерлері, педагогтер, қылмыстық-атқару жүйесі мекемесінің контингенті және 50 жастан асқан тұлғалар өтуі тиіс,- деді Шолпан Садықова.
Шолпан Садықованың айтуынша, бүгінгі күні облыста қолжетімді «QazVac», «Sinopharm» және «Pfizer» вакциналарымен төртінші ревакцинациядан өтуге болады.
Жалпы, Семейдегі эпиджағдай тұрақты. Жыл басынан бастап КВИ-дің 3937 жағдайы тіркелді. Мамыр айында тек екі жағдай тіркелген.
«СТ» — ақпарат
