Бүгін елімізде республикалық референдум өтуде. Облысымызда 1027, ал Семей қаласында 149 дауыс беру учаскесі жұмыс істеп жатыр, — деп хабарлайды Semeytany.kz ақпараттық порталы.
Таңертеңгі сағат 7-де шаһардағы барлық дауыс беру учаскелері ашылды. Семейліктер сағат 7-ден бастап дауыс беруге келе бастады. Өз дауыстарын беруге зейнеткерлер де, жастар да келіп жатыр.
Айта кетелік, азаматтар Ата Заңдағы 33 бапқа ұсынылған түзетулер бойынша дауыс береді.
— Біздің учаскеміз бойынша 1564 дауыс беруші азаматтар тіркелген. Қазіргі уақытта, небары екі сағаттай уақыттың ішінде, 65 адам келіп, өз дауыстарын берді. Азаматтарымыздың еліміздің ертеңіне бейжай қарамайтыны анық, сондықтан дауыс беруде қала тұрғындары белсенділік танытады деген ойдамын,- дейді қаладағы 260-шы сайлау учаскесіндегі референдум комиссиясының төрағасы Имдат Эфендиев.
Қала тұрғындары кешкі сағат 8-ге дейін дауыс бере алады.
«СТ» — ақпарат
