Бүгін еліміз үшін шын мәнінде тарихи күн. Халқымыз жарқын болашақ үшін таңдау жасап жатыр. Цементшілер кентінде орналасқан №1135 сайлау учаскесінде болып, референдумға дауыс беру барысын бақылап қайттық, — деп хабарлайды ABAI AIMAQ MEDIA, Semeytany.kz ақпараттық порталы.
Аталған референдум учаскесінің төрайымы Күләш Айтқазинаның айтуынша, учаскеде 2349 дауыс беруші тіркелген. Тұрғындар таңғы 7-ден бері дауыстарын беріп жатыр.
— Осы референдумға дауыс беру үшін бас қаладан туған жеріміз, тіркелген тұрғылықты мекеніміз Семей қаласына арнайы келіп, өз таңдауымызды жасадық. Ел ертеңі үшін, кемел келешек үшін дауыс бердім,— дейді Сағындық Ерқасымұлы.
Ауа райының қолайсыздығына қарамастан, дауыс беруге келген тұрғындардың қарасы қалың. Бақылаушылардың пікіріне сүйенсек, референдум учаскелерінде тәртіп бұзушылықтар тіркелмепті.
— Әділетті өтіп жатыр. Қандай да бір нормалар мен ережелердің бұзылғанын байқаған жоқпыз. Дауыс беру процесі барлық талапқа сәйкес жүріп жатыр,— дейді «Партиялық емес байқау орталығы» қоғамдық бірлестігінің бақылаушысы Біржан Орманбеков.
Шараның ашық өткізілуін бақылау мақсатында халықаралық стандарттарға негізделген және қазақстандық талаптарға бейімделген Exit-poll әдісі қолданылуда.
— Біз референдумда сауалнама жүргізіп, дауыс берушілердің пікірін аламыз. Олардың жауабы құпия түрде сақталатын болады. Exit-poll әдісін меңгеру үшін мамандар, біздер арнайы дайындалып, нұсқаулықпен танысып, орталықта сауалнама жүргізу әдісін, маңызы мен мақсатын толыққанды меңгердік,— дейді № 1135 учаскенің шығаберісінде сауалнама жүргізіп тұрған Exit-poll маманы Айнұр Құдайбергенова.
Айта кетейік, бүгін елімізде Конституцияға өзгерістер енгізу бойынша республикалық референдум өтіп жатыр. Референдумда дауыс беруге құқылы азаматтардың тізімінде 11,7 млн сайлаушы тіркелген. Барлық сайлау учаскесі таңғы 7:00-ден 20:00-ге дейін жұмыс істейді.
