Шығыс Қазақстан облысында танымал спортшылар, мәдениет және өнер қайраткерлері референдумға белсенді қатысып жатыр, деп хабарлайды Egemen.kz.
Қазақстанның Еңбек сіңірген спорт шебері, халықаралық турнирлердің бірнеше дүркін чемпионы, «Қазақстан барысы», «Әлем барысы» Айбек Нұғымаров Семейдегі №178 учаскеде дауыс берді.
«Осы референдумнан кейін біздің елімізді үлкен өзгерістер күтіп тұр. Мен бүгін өз таңдауымды жасадым. Адамдардың учаскелерге көтеріңкі көңіл-күймен барып жатқаны қуантты», дейді облыстық мәслихат депутаты, Семей Көлік колледжінің директоры Айбек
Семейде ауа-райының қолайсыздығына қарамастан халықтың жоғары белсенділігі байқалады. Қаладағы сайлау учаскелерінде Қазақстанның атақты футболшылары да өз таңдауын жасады.
«Біз Андрей Карповичтің достарының футбол мерекесіне Семейге арнайы келген едік. Бүгін еліміз үшін айтулы күн. Әрбір азамат өзінің дауысы арқылы елімізде болатын өзгерістерге өз үлесін қосуға мүмкіндігі бар. Сондықтан біз осы мүмкіндікті пайдаланып, Семейдегі сайлау учаскесінде дауыс бердік», деді футболдан Қазақстанның үш дүркін чемпионы Давид Лория.
Сондай-ақ даңқты жерлестеріміз Самат Смақов пен Андрей Карпович те саяси науқаннан тыс қалмады.
«Кеше біз тамаша футбол мерекесін өткіздік. Бүгін – тарихи күн. Конституцияға енгізілетін өзгерістерге әрбір азамат өз үлесін қоса алады. Туған қалама келіп дауыс бергеніме қуаныштымын», деп түйіндеді ойын атақты футболшы Андрей Карпович.
Бүгін Алтай ауданында алғаш рет пауэрлифтингтен спорт шебері, халықаралық, республикалық, облыстық жарыстардың қатысушысы Әмина Волченко да дауыс берді.
«Еліміздің басты заңы ретінде Конституцияға айтарлықтай өзгерістер мен толықтырулар енгізіледі. Бұл азаматтарға өзінің азаматтық ұстанымын көрсетуге тамаша мүмкіндік», дейді Әмина.
