Бүгінгі таңда Шығыс Қазақстан облысындағы бірқатар өңірлерде, атап айтқанда ауыл шаруашылығы саласы біршама қарқынды дамып келе жатқан Бесқарағай, Бородулиха және Ұлан аудандарында жайылымдық жер тапшы.
Қазіргі күні бұл өңірлерде иесіз қалған жерлерді мемлекет меншігіне қайтару жұмыстары жүргізілуде. Бұл жайлы ШҚО Ақпарат орталығында өткен баспасөз мәслихаты барысында облыстық Жер қатынастары басқармасының басшысы Надежда Михайлис ресми түрде мәлімдеді.
— Өткен жылы Мемлекет басшысы қараусыз қалған жерлерді тәркілеу жайлы тапсырма берді. Жергiлiктi әкiмдiктер бос жатқан жерлердiң тiзiмiн жасады. Атқарылған жұмыстардың нәтижесінде бұрын пайдаланылмай келген 1 миллион гектардан астам жер анықталды. Бүгінгі таңда Шығыс Қазақстанда мал жаюға қажетті жер көлемі 146 мың гектарды құрайды, — деп атап өтті Надежда Михайлис.
Надежда Михайлистің айтуынша, бүгінде Бесқарағай, Бородулиха, Ұлан аудандарында және Өскемен қаласында жайылымдық жер тапшылығы сезілуде. Бос жатқан жерлерді мемлекетке қайтару процедурасына бір жылға жуық уақыт кетеді екен.
Жалпы айтсақ, екінші деңгейлі банктерде кепілге қойылған, банктердің меншігіне немесе жер пайдалануына берілген ауыл шаруашылығы мақсатындағы жерлердің үлкен көлемін пайдаланбау фактілері болған жағдайда, бүгінгі күні тұрғындарға ауыл шаруашылығы мақсатындағы жерлердің болмауы алаңдаушылық туғызып отыр. Осыған байланысты мұндай жерлерді мемлекет меншігіне қайтару қажет. Сондай-ақ басқа мақсатта пайдаланылуына және пайдаланылуына бақылаудың жоқтығы да жиі сұрақтар туындатады екен.
Ұлан ӘЗІРБЕК,
«Семей таңы»
