Қазақстандықтар үшін референдум туралы ұсыныс күтпеген жағдай болды деп ойлаймын. Өйткені еліміз Тәуелсіздігін алған 30 жыл уақыттан бері қоғамда қордаланып қалған мәселелер көп.
Президент ұсынған елдің саяси жүйесін кешенді жаңғырту бағдарламасы, көптеген жылдар бойы шешімін күткен
мәселелерге орай, түбегейлі өзгерістерге деген қоғамдық сұранысқа негізделген. Ата Заңымызға енгізілетін өзгерістер Жаңа
Қазақстанның жаңа тарихының бастауы екендігі анық.
Әсіресе еліміздегі билік өкілеттіктерін қайта бөлу, облыстардың, республикалық маңызы бар қалалардың және астананың
әкімдерін өңір мәслихаттары депутаттарының келісімімен баламалы негізде тағайындау — Жаңа Қазақстанның қалыптасуы
мен дамуына, халықтың елді басқаруға қатысуын арттыруға, қазақстандықтардың құқықтарын қорғаудың конституциялық
тетіктерін күшейтуге жасалған қадам.
Сондықтан осындай саяси науқанның кеш те болса елімізге оралуы — маңызды іс. Қазақстандықтар өздерінің билікке
ықпал ете алатынын сезінуі соңғы жылдары айтарлықтай әлсіреп кеткенін мойындауымыз керек.
Бүгінгі таңда халықтың сайлауға деген сенімінен гөрі күдігі басым екенідігін де байқаймыз. Референдум еліміздегі реформаның бастауы екендігін әрқайсымыз түсінуіміз керек. Конституцияға өзгерістер енгізу арқылы біз жаңа қоғам
қалыптастырамыз. Референдум — «барлығын билік шешеді», «тек биліктің қолында» деген парадигманы жойып, қоғамды оятатын, әр қазақстандықтың өзін осы елдің құрушысы, негізін жасаушысы ретінде сезінуіне ықпал ететін мүмкіндік құралы.
Ендеше, еліміздегі өзгерістерді жасауда әр қазақстандықтың сырт қалмауы қажет.
Қуаныш ҚАСЕНОВ,
«Силикат» ЖШС әкімшілік қызметінің басшысы
