Ел Конституциясына ұсынылған өзгерістер мен толықтыруларды
халыққа түсіндіру мақсатында Жарма ауданына Қазақстан
Республикасы Парламенті Мәжілісінің депутаттары Әмірхан
Рахымжанов пен Ирина Унжакова іссапармен келді. Депутаттар
аудандық мәдениет үйінде жергілікті тұрғындармен, білім және
мәдениет саласының қызметкерлерімен кездесіп, конституциялық
реформаның негізгі қағидалары және ағымдағы жылы 5 маусымда
өтетін жалпыреспубликалық референдумға ұсынылатын өзгерістерді
түсіндіріп, сұрақтарға жауап берді.
Кездесу барысында мәжілісмендер суперпрезиденттік басқару формасынан күшті
Парламенті және есеп беретін Үкіметі бар президенттік республикаға көшу үшін елдің саяси дамуын қайта құру, демократияландыру бағытын одан әрі дамыту қажеттілігінің пісіпжетілгендігін атап өтті. Депутаттар ел үшін тағдыршешті маңызы бар бүкілхалықтық референдум өткізудің маңыздылығына тоқталды.
Конституцияның 33 бабына енгізілетін өзгерістер Президенттің өкілеттіктерін азайту,
жоғары заң шығарушы органның рөлін арттыру, Конституциялық сот институтын құру және
басқа да өзекті мәселелерді қамтиды. Қазақстандықтардың алдағы референдумға белсенді қатысуы — әрбір азаматтың мемлекеттің одан әрі дамуына, Жаңа Қазақстанның келешегіне деген көзқарасын танытуға мүмкіндік береді.
Кездесуге қатысушылар маңызды саяси оқиғаға қатысты өз ойларын білдіріп, халық
қалаулыларына бірқатар көкейкесті мәселелерін де жеткізді.
Іссапар барысында Парламент Мәжілісінің депутаты Ирина Унжакова AMANAT
партиясының Жарма аудандық филиалында активпен және бастауыш партия ұйымының
ардагерлерімен кездесті.
Сұхбат алаңында оған қатысушылар барлық қазақстандықтар елдегі орасан зор
демократиялық өзгерістердің, Екінші республиканың құрылуының куәгерлері мен
қатысушылары болуға тиіс екенін атап өтті.
Еліміздің саяси жүйесіндегі ауқымды реформалар, Негізгі Заңды жаңарту, жергілікті
жерлерде халықпен бірге биліктің өкілді және атқарушы органдарын күшейту, Президенттің
бірқатар өкілеттіктерін қысқарту, Қазақстанның әрбір азаматының конституциялық
құқықтары мен мүдделерін қорғау, басқа да маңызды мәселелер ҚР Конституциясының
33 бабына енгізілетін түзетулердің негізгі мазмұнын құрайды. Кездесуде осы мәселелер
әңгімеге арқау болды. Депутат жармалықтарды республикалық референдумды қолдауға,
5 маусымда сайлау учаскелеріне келіп, Қазақстанның саяси және экономикалық тұрақты,
демократиялық мемлекет ретінде одан әрі дамуы мен өркендеуі үшін дауыс беруге
шақырды.
Кәусар АРЫҚХАНҚЫЗЫ
