Мектептегі сабақтар аяқталып, оқушылардың көптен күткен жаз мезгілі де келіп жетті. Балалардың жазғы демалысын тиімді ұйымдастыру, бос уақыттарының пайдалы, көңілді өтуіне барлық жағдайды жасау ата-аналардың, білім мекемелерінің, сонымен қатар жергілікті органдардың да міндеті. Жаз кезінде балалардың көпшілігі лагерьлерге баруға асығады. Қазіргі күндері оқушылардың жазғы уақытын қызықты өткізу, денсаулықтарын нығайту мақсатында Семей қаласына қарасты демалыс лагерьлерінде дайындық жұмыстары қызу жүргізіліп жатыр. Апта ішінде қала әкімі Бақытжан Байахметов «Орбита» сауықтыру лагеріндегі дайындық жұмыстарының барысын тексеріп қайтты.
Семейде қала сыртындағы білім бөліміне қарасты «Түрксібке — 50 жыл», «Жас қанат» және «Радуга» сауықтыру лагерьлері маусым айының ортасынан бастап ашылады. Жазғы кезеңде №8 балалар үйінің тәрбиеленушілері үшін «Достық» спорт лагері мен «Орбита» лагері жұмыс істейтін болады. Ал «Лесная сказка» лагері жетім балалар мен ата-анасының қамқорлығынсыз қалған балаларға арналған мектеп-интернат тәрбиеленушілеріне арналған.
Қазіргі уақытта лагерь ғимараттарын жөндеу, сумен жабдықтау жүйесін дезинфекциялау, өрт қауіпсіздігі, аумақты абаттандыру және басқа да дайындық шараларына байланысты мәселелер пысықталуда. Қызметкерлер құрамы да жасақталу үстінде.
Мектеп жанындағы лагерьлерде дәстүрлі форматта балалардың демалысы мен еңбекпен қамтылуын ұйымдастыру бойынша іс-шаралар жоспары дайындалды, «Балалар мен жасөспірімдерді жұмыспен қамту картасы» жобасы іске асырылуда. Қосымша ұйымның мекемелерінде балалардың бос уақытын ұйымдастыру мақсатында мамандандырылған оқу алаңдары жұмыс істейді. Балалар мен жастардың шығармашылық сарайында «Жұлдыз» күндізгі лагері (200-ге жуық бала), биологиялық орталықта 500-ден астам баланы қамтитын «Бақытты бала» эколагері» жұмыс істейді. Бағыттар бойынша үйірмелер мен спорт секциялары 25 аула клубында жұмыс істейтін болады.
«Орбита» ауылдық сауықтыру лагері табиғи және микроклиматтық жағдайлары қолайлы Озерки ауылдық округінде Қаштақ ауылында орналасқан. Жаз мезгілінде онда 5 жастан 17 жасқа дейінгі 80-нен астам тәрбиеленуші демалатын болады.
Лагерьдің тыныс-тіршілігі балалар үйінің педагогикалық кеңесінде бекітілген күн тәртібіне сәйкес жүзеге асырылады. Лагерьдің алғашқы ағымы 10 маусымда басталады.
Мұнда асхана, волейбол, баскетбол және футбол алаңы, спорт және балалар алаңы, бассейн, монша, 4 жатын ғимараты, шаруашылық корпустар, медициналық пункт, оқу залы және кинозал бар.
Балалар лагерінде педагогтер, қосымша білім беру педагогтері, медицина қызметкерлері, психолог және дене шынықтыру нұсқаушылары жұмыс істейтін болады.
Лагерь бағдарламасында квестер, шығармашылық сайыстар, қызықты викториналар, спорттық турнирлер, туған өлкенің көркем жерлеріне саяхаттар, соның ішінде виртуалды экскурсиялар бар.
Динара НҰРЛЫБЕКҚЫЗЫ,
«Семей таңы»
