Ел Президенті Қасым-Жомарт Тоқаев биылғы 2022 жылды Балалар жылы деп жариялағаны белгілі. Осы ретте Шығыс Қазақстанда әр түрлі әлеуметтік топтардағы балалардың сауығуына, жазғы демалысына және бос уақытын тиімді өткізуге үлкен көңіл бөлінуде.
Жақында Ұлан ауданының Төменгі Тайынты ауылында орналасқан «Үміт» балалар үйінің «Царская Долина» лагерінде жазғы сауықтыру маусымының ресми ашылуы өтті.
Балалар мен педагогтерді қалалық мәслихат депутаты және Amanat партиясының атқарушы хатшысы Арайлым Есімбекова құттықтады.
— Балалар, сіздерді жазғы маусымның ашылуымен шын жүректен құттықтаймын! Сіздерге денсаулық, жақсы демалыс тілеймін. Жаңа оқу жылына күш жинап қайтыңыздар,- деп ақжарма тілегін білдірді Арайлым Есімбекова.
Жаңа маусымның ашылу салтанатына қатысушалар «Үміт» балалар үйі тәрбиеленушілерінің өнерін тамашалады.
Мерекелік жиын «Тайынты кештері» ойын-сауық бағдарламасына ұласты. Балалар түрлі сайыстарда өзара жарысып, бұл күнді көңілді өткізді.
— Біз жыл сайын осы әдемі жерге келіп, әр жолы жаңа бір нәрсе ойлап табамыз. Лагерьде ешкім бос отырмайды, біреу спортпен шұғылданады, түрлі ойындар ойнайды, кітап оқиды. Мен, негізінен, би билеуге мүмкіндік беретін іс-шараларды жақсы көремін, — дейді балалар үйінің тәрбиеленушісі Кристина Шатух.
Сауықтыру лагерінің жетекшісі Гүлжан Салықбаеваның айтуынша, балаларға таза ауада демалу өте маңызды, әрі бұл — міндетті шара.
— Біздің лагерь тамаша жерде орналасқан, айналасын таулар мен көлдер қоршап жатыр, әдемі қарағайлар өсіп тұр, мұндағы табиғат алақандағыдай көз алдымызда. Күзгі және қысқы демалыс кезінде балалардың демалуға уақыты аз, ал жаз — барлық балалардың асыға күтетін жыл мезгілі. Лагерьдегі балаларға бәрі ұнайды, оларға шығармашылық әлеуетті дамыту үшін барлық мүмкіндіктер берілген. Олар барлық іс-шараларды өздері ойлап табады, ал біз оларға көмектесеміз, — дейді Гүлжан Салықбаева.
Іс-шараның соңы балалар би кешіне жалғасты.
Ерлан АЙҚЫНҰЛЫ,
«Семей қаласы»
