Қазақстанда маусым айының әр үшінші жексенбісі — Медицина қызметкерлерінің күні. Бұл күні елімізде денсаулық сақтау саласы мамандары ерекше сый-құрметке бөленеді. Бұл мереке — медицина қызметкерлері үшін ғана емес, бүкіл халқымыз үшін де ерекше мейрам. Дәрігерлердің еңбегі ерен екенін әсіресе пандемия кезінде айрықша сезіндік. Уақытпен санаспай, науқастың жанын сақтап қалу үшін қолдан келгеннің бәрін жасап, жанын сала еңбек етіп жүрген ақ халатты абзал жандар қандай құрметке болса да лайық.
Медицина қызметкерлері күні қарсаңында Өскеменде салтанатты іс-шара өтті. Облыстық мәслихаттың хатшысы Денис Рыпаков пен облыс әкімінің орынбасары Шәкәрім Бұқтұғұтов Шығыс Қазақстанның үздік медицина қызметкерлерін марапаттау рәсіміне қатысты,- деп хабарлайды ШҚО Ақпараттық орталығы.
Мереке күні жоғары кәсібилігімен және адами қасиеттерімен ерекшеленген дәрігерлер, фельдшерлер мен медбикелер, санитарлар мен жедел жәрдем қызметкерлері алғыс пен құрметке бөленеді. Барлық медицина қызметкерлерін ШҚО мәслихатының хатшысы Денис Рыпаков та құттықтады. Мәслихат хатшысы ең алдымен бар өмірін халық денсаулығын сақтауға арнап, қазірде құрметті демалыстағы және әлі күнге дейін еңбек етіп, кәсіби тәжірибесін жастарға үйретіп жүрген сала ардагерлеріне алғыс білдірді.
— Жүрек қалауымен өз өмірін денсаулық сақтау саласына арнаған барлық медицина қызметкерлерін шын жүректен құттықтаймын! Адамдар өз өмірі мен денсаулығын сіздердің қолдарыңызға сеніп тапсырады. Ұзақ жылдар бойы жанкешті еңбегімен, мамандығына адалдығымен, баға жетпес тәжірибесімен адамдарға қызмет етіп келе жатқан денсаулық сақтау саласы ардагерлеріне ерекше алғысымды білдіремін, — деді облыстық мәслихат хатшысы.
Облыстың денсаулық сақтау саласының үздік мамандары медальдармен, Құрмет грамоталарымен, төсбелгілермен және алғыс хаттармен марапатталды.
«Еңбек ардагері» төсбелгісімен Глубокое ауданының орталық ауруханасының перзентхана бөлімінің меңгерушісі Людмила Логейко, облыстық фтизиопульмонология орталығының хирург дәрігері Сағи Қожабаев, Риддер қалалық ауруханасының отоларингологі Серік Жамантаев, сондай-ақ «Денсаулық сақтау ісінің үздігі» және «Денсаулық сақтау ісіне қосқан үлесі үшін» белгілерімен Өскемен қаласының №2 емханасының пульмонолог дәрігері Ольга Говорухина, Бородулиха ауданы ауруханасының отоларингологі Ольга Мокроусова, мамандандырылған балалар үйінің медбикесі Майра Сүлейменова, Көкпекті аудандық ауруханасының медбикесі Алмаш Мамабаева, Семей қаласының жұқпалы аурулар ауруханасының бөлім меңгерушісі Дәулет Секербаев марапатталды.
Облыс әкімі Даниал Ахметовтің денсаулық сақтау саласын дамытуға ерекше көңіл бөліп отырғаны белгілі. Мәселен, облыс әкімінің бастамасы бойынша 5 жыл ішінде 36 млрд теңге қаржыға халықаралық стандарттарға сәйкес келетін 3 мыңнан астам заманауи жабдық сатылып алынды, бұл — жоғары технологиялық медициналық техника көлемін 2,5 есеге ұлғайтуға мүмкіндік берді. Алайда тіпті ең заманауи жабдықтар мен жаңа технологиялардың дәрігерсіз ешқандай пайдасы болмайды, өйткені, кез келген басқа саладағы сияқты, медицинада ең маңыздысы – білікті әрі жауапкершілігі жоғары мамандардың болуы.
— Мереке қарсаңында барлық медицина қызметкерлеріне мықты денсаулық, қиыншылығы мен сауабы қатар жүретін еңбектеріңізге табыс тілеймін. Сондай-ақ ұйымдастырушыларға бүгін, пандемиядан кейін екі жыл өткен соң, бәрімізді жинап, осындай ерекше мереке ұйымдастырғаны үшін алғыс айтамын, — деді №4 қалалық аурухананың бас дәрігері Сергей Попов.
Облыстық денсаулық сақтау басқармасы сонымен қатар, Медицина қызметкерлері күніне орай, 5 номинациядан тұратын байқау жариялады, оған Шығыс Қазақстанның барлық медициналық ұйымдары қатысты.
— Жас маман ретінде мен бүгін «Жастық шақ. Жаңашылдық. Талант» аталымы бойынша жеңімпаз атанғаныма өте қуаныштымын. Бұл — мен үшін үлкен мотивация, — дейді облыстық көпбейінді онкология және хирургия орталығының анестезиолог-реаниматолог дәрігері Ботагөз Тоқтарбекқызы.
Естеріңізге сала кетейік, 5 жыл ішінде облыс бойынша 5,5 мыңнан астам маман біліктілігін арттырудан өтті, оның ішінде 341 дәрігер шетелде кәсіби шеберлігін жетілдірді. Осы бағдарлама жалғасын тауып, ағымдағы жылы халықаралық орталықтарға тағы да 100-ден астам адамды оқуға жіберу жоспарланып отыр.
Бұл шаралар арқылы Шығыс Қазақстан әр адамға сапалы және жоғары технологиялық медициналық көмек көрсете алатын облысқа айналары анық.
«СТ» — ақпарат
