Еркетаева Гүлнар Бекешқызы – «Семей медицина университеті» КеАҚ госпиталінде оториноларингология бөлімінің аға медбикесі. 1963 жылы Көкпекті ауданы Қарағандыкөл ауылында көп балалы отбасында дүниеге келген Гүлнар Бекешқызы бала күнінен ақ халатты абзал жан болуды армандаған екен. Қарағандыкөл ауылындағы Шмитт орта мектебінде білім алып, 10 сыныпты тамамдаған соң, Семей медициналық училищесіне оқуға түседі. 1983 жылы оқуын ойдағыдай аяқтап, облыстық денсаулық сақтау бөлімінің жолдамасымен облыстық ауруханаға жұмысқа қабылданыпты. 1992 жылдан бүгінгі күнге дейін ересектер оториноларингология бөлімінде аға медбике қызметін атқарып келеді.
— Мен көпбалалы отбасында дүниеге келгенмін. Сіңілім кішкентай күнінде аурушаң болатын. Оның ауырып жатқанын көріп, көмек бергім келетін. Сол себепті есейгенде медицина саласының қызметкері боламын деп өзім-өзім уәде бердім. Кейіннен Семей медициналық колледжіне «Медбике ісі» мамандығына оқуға түстім. Міне, қырық жылдан асты, өз ісіме адал қызмет атқарып келемін,- дейді кейіпкеріміз ағынан жарыла.
Медицина – қанша заман өтсе де өзектілігін жоймайтын ғылым саласы. Сондықтан да білікті де тәжірибелі мамандарға әрдайым сұраныс жоғары.
— Адам жұмысын сүйіп істесе, одан ешқашан жалықпайды. Мен өз мамандығымды жақсы көремін, себебі науқастардың дертіне шипа іздеп, оларға қол ұшын соза аламын. Ауруынан айыққан емделушілердің алғысы жанымызды жадыратып, жұмыс істеуге құлшындырады,- дейді Гүлнар Бекешқызы.
Мереке қарсаңында университет госпиталі директоры Альжанов Серік Нұрлыбекұлын, директордың орынбасары Какимбаева Раушан Құсайынқызын, аға медбике Гаращенко Марина Александровнаны және басқа да әріптестерімді құттықтаймын, мықты денсаулық, отбасыларына амандық тілеп, халықтың алғысына бөлене беріңіздер дегім келеді.
Гүлнар Бекешқызының қызы Ақерке Хасенқызы да анасының жолын қуып, медицина саласын таңдапты.
Сөз соңында барлық медицина саласының қызметкерлерін мерекелерімен құттықтай отырып, отбасыларына бақыт, еңбектеріне табыс тілейміз. Тек биік шыңдардан көрініп, еліміздің дамуына өз үлестеріңізді қоса беріңіздер!
Анар АХМЕТҚАЛИҚЫЗЫ,
«Семей таңы»
