ШҚО әкімі Даниал Ахметов Өскемен қаласында балабақшалар салу мәселесі бойынша арнайы кеңес өткізді.
ШҚО әкімінің айтуынша, балабақшалар бұрын типтік мектепке дейінгі мекеме болған төрт бос ғимаратта ашылады. Қазірдің өзінде бұл ғимараттарда жөндеу жұмыстарын жүргізуге және сенімді басқаруға алуға дайын инвесторлар бар.
— Қазір осы ғимараттарды алып жатқан жеке және квазимемлекеттік құрылымдарға орналастырудың баламалы нұсқаларын ұсындық. Сонымен қатар бес жекеменшік балабақша салынады, — деді аймақ басшысы.
Бес балабақшаның құрылысы мемлекеттік-жекеменшік әріптестік аясында жоспарланып отыр. Қазірдің өзінде халық тығыз орналасқан аудандарда балабақша орны анықталып, тендерлік құжаттама дайындалып жатыр.
— Осылайша, биыл біз мектепке дейінгі мекемелерде 1200 орынды қамтамасыз етеміз. Бүгінгі таңда бізде 3 жастан 6 жасқа дейінгі балабақшаларға кезек жоқ, ал жаңаларын салу 3 жасқа дейінгі балалар топтарына қатысты мәселені шешуге мүмкіндік береді, — деп атап өтті аймақ басшысы Даниал Кенжетайұлы.
Қазіргі күні балабақша құрылысын жүргізуге қатысты жұмыстардың барлығын да ШҚО әкімі Д.Ахметов өз назарында ұстап отыр.
Динара НҰРЛЫБЕКҚЫЗЫ,
«Семей таңы»
