Шығыс Қазақстан облысының қалалары мен аудандарында алдағы қыста отын тапшылығы болмауы тиіс. Ол үшін көмір тасымалын ерекше назарда ұстау қажет. Бұл жайында ШҚО әкімі Даниал Ахметов қала және аудан әкімдерімен жылу беру маусымына дайындық және инфляциялық үдерістер мәселелері бойынша өткен кеңес барысында айтты.
Жиында әлеуметтік маңызы бар азық-түлік тауарларының бағасын тұрақтандыру мәселесі де қаралды. Кеңесте айтылғандай, бірінші кезекте 19 әлеуметтік маңызы бар азық-түлік өнімдеріне қосылатын шекті сауда үстемесін арттыруға жол берілмеуі қажет. Мониторингтік топтар 11 қала мен аудандардағы үй маңындағы 2500 дүкенді тексерген. Заң бұзушылықтар анықталған болса, кәсіпкерлерге алғашқы рет ескерту жасалады.
Сонымен қатар 11 дүкенде жергілікті азаматтардың өтініші бойынша тексерулер қайта ұйымдастырылып, басқа да әкімшілік шаралар қабылданған.
Облыс әкімі сондай-ақ қайтадан құрылған Тарбағатай ауданы мен Самар аудандарындағы жұмысты күшейту қажеттігін де атап өтті.
— Көмір қорына келетін болсақ, қазір өңірдің әлеуметтік нысандарына отын жеткізу жалғасуда. Өскемен ЖЭО-дағы көмір қоры 317 мың тоннаны құрайды. Риддер ЖЭО үлкен алаңдаушылық туғызады, өйткені жүргізілген талдау қазандықтардың тозуы 80 — нен 98 пайызға дейін екенін көрсетті. Біз өз тарапымыздан Риддердің жылыту маусымына уақтылы қосылуы үшін барлық шараларды жасайтын боламыз, — деді аталмыш кеңес барысында облыс әкімі Даниал Кенжетайұлы.
Еске сала кетсек, жылыту маусымына дайындық барысы осыған дейін де бірнеше мәрте талқыланған болатын.
Ерлан АЙҚЫНҰЛЫ,
«Семей таңы»
