Семей қаласының әкімі Бақытжан Байахметов жуырда Шығыс кентіне барып, су құбыры желілерін қайта құру және кеңейту жұмыстарының барысын тексерді.
Қазіргі таңда Аюченко, Көшкінбаева (саяжай кентінен мектепке дейін), Усть-Каменогорская (мектепке дейін), Целинная, Декоравтивная, Луговая, Олимпийская, Веретельников, Железняков, 3-линия, 9-линия, 11-линия, 15-линия, 18-линия және 19-линия көшелері бойынша жөндеу жұмыстары жүргізіліп, Көшкінбаева көшесі, саяжай алабы және Усть-Каменогорская көшесіндегі су құбыры желілерін қайта жаңарту жұмыстары жалғасуда.
Айта кетейік, су құбыры желілерінің құрылысына 396,8 млн теңге бөлінген. Жобаны жүзеге асыруға жауапты мердігер — «SemARTAstroy» ЖШС.
Құрылыс жұмыстары үшін 7 эскалатор, 5 фронтальдық тиегіш, төрт манипулятор (жүк көтергіштігі 8 тоннаға дейін), 9 самосвал, бір автокран және бір КамАЗ жүк машинасы жұмылдырылған. Сондай-ақ қазіргі таңда мұнда 20 жұмысшы мен 27 механизатор, жүргізуші жұмыс істейді.
Сонымен қатар бүгінгі күндері топырақ қазу жұмыстары жүргізілуде. Оның ішінде құбырлар төсеу, сондай-ақ 38 дана құдық орнату жоспарланып отыр.
Орталық су құбыры төселгеннен кейін жергілікті тұрғындар оған тікелей қосыла алады. Орталық желіні төсеу тегін. Сондай-ақ су құбыры желілері жаңа мектепке тартылатын болады, қазір құрылыс аяқталу кезеңінде.
Үйлеріне су келетін сәтті асыға күтіп жүрген тұрғындар атқарылып жатқан жұмыстарға ризашылықтарын білдіруде.
Азамат ЕРСАЙЫН,
«Семей таңы»
