Тәуелсіз Қазақ елінің қарыштап дамуы қай қаламгердің болсын шалқар шабытының шығармашылығына арқау бола алады. Дамудың даңғыл жолына түскен Қазақстанның әр саласы сер-пінді, қуатты мемлекетке айналып келе жатыр. Сондықтан болар, Қазақ елінің дамуына деген қызығушылық сырт елдің жазушыларының да ынтасын туғызып отыр. Әлбетте, «сырт көз сыншыл» дегенмен, жеткен жетістікті өзің емес, өзгенің де көріп, өзгенің де орамды ойы арқылы танудың жөні бөлек.
Қазақ елінің экономикалық бағыттағы батыл қадамдарын, инновация игіліктерін кезекті шығармасына арқау ету КСРО Жазушылар Одағаның мүшесі Сергей Плехановтың алдағы жоспары екен. Осыған орай, Сергей Николаевич Семей қаласының әкімі Айбек Кәрімовтің арнайы шақыртуымен шаһарымызда болып, бірқатар өндіріс ошақтарын аралап, мәдени нысандарды көрді. Әлбетте, экономиканың ажырамас бір бөлігі, тіпті, түп тамыры шағын және орта бизнес. Ал, шағын және орта бизнесте Семейдің мәртебесі биік. Міне, ресейлік жазушының ұлылар мекеніне арнайы келуі бекер емес. Біраз іске қанық болып, Семейдің өндірісін қаламгерлік көзқараспен қадағалау.
Сергей Николаевич КСРО Жазушылар одағының мүшесі. Сондай-ақ, Шығыс өңірі және Ресейдің заманауи келбеті мен саяси көшбасшылары жайлы публицистік және өмірбаяндық еңбектердің авторы. Жуырда ғана оның сиясы кеуіп үлгермеген Катар мемлекеті және оның әмірі шейх Хамад бен Халифа Әл Тәнидің еңбек жолы мен қызметі, мемлекеттің беталысы жайлы кітабы жарыққа шықты. Енді автордың қызығушылығы Қазақстан мемлекетіне ауып отыр. Өйткені, «жақсыны көрмекке» деген қағида жазушының жадында.
Әлемде, қала берді Орта Азияда дамушы қаншама мемлекет болғанына қарамастан, С.Плехановтың кезекті туындысының тақырыбын біздің елімізбен байланыстыруы да тегін емес екен. Жазушының өзі атап өткендей, Қазақстан – ТМД елдері арасындағы қарқынды дамып келе жатқан бірден-бір мемлекет.
— Қазақстан Орта Азияда қай жағынан алсақ та, көш ілгері. Алған асулары аз емес, соған қарамастан күн санап дамып, бәсекеге қабілетті мемлекеттердің қатарына енуді көздеп отырған, саяси бағыты бар ел. Сонымен қатар, қазіргі таңда Еуразиялық одақ құру идеясы іске асуда. Ресейліктердің Қазақстанға деген қызығушылықтары жоғары деңгейде,- дейді.
{jcomments on}С. Плеханов 35 жыл бұрын Семей өңірінде болған екен. Шаһарымыздың болмысымен баяғыдан таныс. Жадында жатталған естеліктер де бар. Шаһардың мәдени ошақтарын аралап, өткені мен бүгінін салыстыра отырып саралаған С.Плеханов:
-Бүгін Ф.М.Достоевскийдің әдеби – мемориалды үй – мұражайын көруге мүмкіндік алдым. Сонымен қатар, Невзоровтар отбасы мұражайындағы туындыларды тамашаладым. Бұл мұражай 35 жыл бұрын болмаған. Қазіргі таңда Семейдің мәдени деңгейі жоғары дәрежеге көтерілгендігін айта аламын,- деді.
Сондай-ақ, Сергей Николаевич «СемАз» машина құрастыру зауыты мен автобустар шығаруға мамандандырылған «Daewoo Bus Kazakhstan» кәсіпорынының, Семей былғары-тері комбинатының жұмысымен танысты.
-Қаладағы автоқұрастыру, трактор құрастыру кәсіпорындарының жұмысын, беталысын байқадым. Бұл саланың да кең қанат жайып, дамып келе жатқандығы көрініп тұр. Бұрын-ғы тұралап қалған өндіріс ошақтарының қайта жандануы мені қатты қуантты,- деп Сергей Плеханов өз пікірімен бөлісті.
Экономикалық дамуымен қоса, әр мемлекеттің медициналық жағдайының жақсы болуы да маңызды мәнге ие. Елбасымыз айтқандай, «ХХІ ғасырдағы дамыған ел дегеніміз – белсенді, білімді және денсаулығы мықты азаматтар қалыптастыру». Әсіресе, Кеңес заманында ажал аждаһасының азуына іліккен Семей өңіріндегі халықтың денсаулығы басты назарда. Осы орайда, жазушы Ядролық медицина орталығының жұмыс қарқынын көрді. Аждаһаны алғашқы болып ауыздықтап, бейбіт өмірге көз тіккен халықтың Түйемойнақ аралындағы «Бейбітшілік» монументіне тағзым етті.
Биылғы жылғы арнайы сапарын Өскемен қаласынан бастаған Сергей Николаевич бірер жыл бұрын Астана, Алматы, Шымкент қалаларына барған. Бір сөзбен айтқанда, Қазақстанның тыныс-тіршілігімен таныс. БАҚ құралдары, әсіресе, ғаламтор арқылы елі-мізде орын алып жатқан соңғы жаңалықтардан құлағдар болып отыратын көрінеді.
— Халықтың тұрмыс – тіршілігі, әлеуметтік ауқаты күн санап артып келеді. Әсіресе, жастар жағы тың бастамаларға иек артып, білім көкжиегін кеңейтуде. Әлбетте, ертеңгі елдің болашағы — жастар. Президент Н. Әбішұлы жастарға бекерге сенім артып отырған жоқ,- деген пікірінің өзінен қаламгердің Қазақстанның дамуы жайлы туындысына қазірден бастап кіріскендігін аңғару қиын емес еді. С. Плеханов Қазақстандағы сапарын Қарағанды, Теміртау, Байқоңыр қалаларында жалғастырмақ.
Әйгерім СӘРСЕНҒАЛИ,
“Семей таңы”.
