Өскеменде амфитеатр алаңында полицейлер «Алтай» би тобымен бірге вальс биледі. Маусымның жайма-шуақ күнінде қалалық жағалауда әуезді ән шырқалып, полицейлер ханымдарды биге шақырды.
Осылайша, полицейдің жұмысы тек тәртіп пен сап түзеу ғана емес, сонымен қатар әдемілік пен әсемдіктен де тұратындығын нақты іспен көрсетті.
Жас құқық қорғау қызметкерлері бұл іс-шараны Қазақстан полициясының 30 жылдығына арнап, «Офицер вальсі» композициясын орындады.
— Бүгін бұл жерде бізге капитандар, лейтенанттар және түрлі қызметтердің аға лейтенанттары өз шеберліктерін көрсетті. Осындай іс-шаралар полиция қызметкерлерінің имиджін арттыруға ықпал етеді деп санаймын, — дейді бұл орайда кадр саясаты басқармасы бастығының орынбасары Серікжан Абуахитов.
Полицейлерде арнайы дайындалуға көп уақыт болған жоқ. Бар болғаны бес күн. Бірақ жемісті болды дейді әріптестері.
Осылайша, жергілікті жас полицейлер би қимылдарын үйреніп, содан кейін шеберліктерін шыңдаған. Өнер көрсеткен барлық 11 жұп кәсіби бишілер сияқты денелерін тік ұстап әрі сенімді түрде жүріп өтіп, тамашалаушы барша көрермендердің көңілінен шыға білді.
Айта кетейік, өнер көрсетуге қызметкерлер арасынан жедел қимыл арнайы жасағының он полицейі және кадр саясаты басқармасынан бір өкілі арнайы таңдалыпты.
«СТ» — ақпарат
