Кеше Семей қалалық мәслихатының кезекті 30-шы сессиясы өтті. Сессия жұмысына қала әкімі Айбек Кәрімов, Шығыс Қазақстан облысы бойынша тексеру комиссиясының төрағасы Серік-қазы Оразалиев, қала әкімінің орынбасарлары, құқыққорғау, дербес бөлім басшылары, мекемелер мен қоғамдық ұйымдар өкілдері қатысты. Халық қалаулылары күн тәртібінде бірнеше мәселе қарады.
Семей қалалық қаржы бөлімінің басшысы Роза Кәкімованың 2013 жылғы қала бюджетінің атқарылуы туралы депутаттар алдында есебі тыңдалды. Роза Құдайбергенқызының айтуынша, өткен жылы мемлекеттік бағдарламаларды жүзеге асыруға бөлінген қомақты қаражаттың 99,3% пайызы игерілгенін атап өтіп, әр салаға бөлінген қаржының халық қалаулылар алдында таразылап берді. Бөлім басшысының баяндамасынан кейін, депутаттар өздерінің көкейінде жүрген сауалдарын жолдады. Мәселен, депутат Риза Молдашева 2013 жылы «Балапан» бағдарламасы шеңберінде қанша қаражат бөлінгенін, оның ішінде жекеменшік балабақшаларда мемлекеттік тапсырыс бойынша қанша бала орналасқанын, 2014-2015 оқу жылында білім ошақтарында ыстық тамақ мәселесі қалай шешілетіндігі тұрғысында өз сауалын жолдады. Бұл ретте, Роза Құдайбергенқызы өткен жылы «Балапан» бағдарламасы бойынша 405 млн. теңге қаражат бөлініп, оның игерілгенін атап өтіп, 3 мемлекеттік, 10 жекеменшік балабақша мен мектеп жанындағы шағын орталықтарда жиыны 2940 бүлдіршін балабақшамен қамтылғандығына тоқталды. Сондай-ақ, ол мектептегі ыстық тамақ мәселесі мемлекеттік сатып алу заңы аясында жүзеге асырылатынын, үстіміздегі жылдың 1 маусымынан бастап өзгертілген Заң негізінде төмен баға ұсынған емес, бұл істе тәжірибелі әрі талапқа сай үміткерлерді таңдайтындығын айтты. Осы сауалға қосымша ретінде білім бөлімінің басшысы Гүлжан Алтынбекова 5541 бала былтырғы жылы тегін тамақпен қамтамасыз етілгенін, оған жергілікті бюджеттен 124 млн. теңге төленгендігі жөнінде депутаттарды ақпараттандырды.
Шығыс Қазақстан облыстық тексеру комиссиясының төрағасы Серікқазы Оразалиев ШҚО бойынша тексеру комиссиясы Семей қаласының 2013 жылғы бюджетінің атқарылуы туралы есепті жан-жақты талдай келе, әлеуметтік-экономикалық тұрғыдан оң динамикалық көрсеткішке ие екендігін айтып, алғашқы сауалды түйіндеді.
Екінші ретте, 2012 жылдың 15 қаңтарында мәслихат депутаттарының сайлау алдындағы науқан барысында сайлаушылардан түскен ұсыныстар мен ескертулер бойынша іс-шаралардың орындалу барысы сөз болды. Бұл мәселе төңірегінде баяндама жасаған қала әкімінің аппарат басшысы Шаған Жұмақсанов 2012 жылы тұрғындар тарапынан жалпы 140 мәселе көтерілгенін айтты. Оның 92-сі тұрғын үй-коммуналдық шаруашылық саласына қатыс-ты екен. Ал ағымдағы жылдың алғашқы бес айында 44 ұсыныс пен ескертулер шешімін тауып, 54 мәселе бойынша түсіндірме жұ-мыстары жүргізілсе, 42 ұсыныс төңірегінде жұмыс жүргізіліп жатыр екен.
{jcomments on}Халық қалаулыларының назарына іліккен тағы бір мәселе өткен жылғы жылу беру маусымы қорытындыланып, 2014-2015 жылғы жылу беру маусымына дайындық барысы болды. Семей қалалық ТҮКШ басшысының міндетін атқарушы Әсет Сүлейменов пен «Теплокоммунэнерго» мекемесінің техникалық директоры Асхат Букатов жылу беру маусымына дайындықтың жүргізіліп жатқандығын алға тартты.
Жалпы, жылу мәселесінің толықтай шешімін табатын күні алыс емес сияқты. Қала басшылығы бұл тұрғыдан оңтайлы жол тапқан. Айбек Мүталапханұлының айтуынша, шаһардағы тозығы жеткен құбырларды ауыстыруға байланысты құжаттар дер кезінде дайындалып, республикаға жіберілгенімен, республикалық бюджеттен қолдау таппаған. Санаулы күн бұрын облыс орталығында өткен отырыста А.Кәрімов жылу құбырларын толықтай жөндеуге қатысты Еуропалық банктің өкілдерімен келіссөздер жүргізген еді. Маусым айының соңында бұл іс толығымен шешіледі деп күтілуде.
Сондай-ақ, сессияда ауылдық-елдімекендерде денсаулық сақтау ұйымдарының халыққа қызмет көрсету жағдайы мен техникалық базасын нығайту, қалалық әйелдер ісі жөніндегі және отбасы-демографиялық комиссия құрамын бекіту және тағы басқа мәселелер талқыланды.
Әйгерім СӘРСЕНҒАЛИ,
«Семей таңы»
