Ауыл шаруашылығы министрі Ербол Қарашөкеев субсидиялаудың жаңа тетігі әзірленіп жатқаны туралы айтты.
Жұмыс сапарымен Шығыс Қазақстан облысына келген Ауыл шаруашылығы министрі Ербол Қарашөкеев Солнечное кентіндегі «Майлы дақылдардың тәжірибелік шаруашылығы» ЖШС қызметімен танысып, оқу орталығын, 1200 басқа арналған сүт-тауар фермасын, серіктестіктің селекциялық жетістіктер көрмесін, кәсіпорын қызметкерлері үшін салынып жатқан тұрғын үй кешенін аралады.
Аграршылармен сұхбат барысында өңірде көктемгі дала жұмыстары жоспарланған мерзімде сәтті аяқталғаны, сондай-ақ «Кең Дала» бағдарламасы шеңберінде форвардтық сатып алу және жеңілдікпен кредит беру көлемі ұлғайтылғаны туралы сөз болды.
Ербол Қарашөкеевтің айтуынша, қазіргі уақытта Ауыл шаруашылығы министрлігі ауыл шаруашылығы тауарын өндірушілермен бірлесіп субсидиялаудың жаңа тетігін жан-жақты зерттеп, әзірлеу үстінде.
— Шығыс Қазақстан облысында 2022 — 2024 жылдар кезеңінде АӨК саласында 34 инвестициялық жоба, сондай-ақ оларды іске асыру үшін инженерлік – коммуникациялық инфрақұрылымды жүргізу жоспарланған, — деп атап өтті министр.
Сонымен қатар Е.Қарашөкеев, ҚР агроөнеркәсіптік кешенін қолдауға ағымдағы жылы 310 млрд теңгеден астам субсидия қарастырылғанын, оның ішінде өсімдік шаруашылығына – 80 млрд теңге, мал шаруашылығына – 100 млрд теңге, ауыл шаруашылығы өнімдерін өңдеуге – 8,4 млрд теңге, қаржы құралдарына – 120,4 млрд теңге бөлінетінін атап өтті. Жалпы, отандық агроөнеркәсіптік кешеннің тұрақтылығын сақтау үшін агробизнес субъектілерін қаржыландыруға қосымша 298,1 млрд теңге бөлініп, оның ішінде саланы субсидиялауға 139 млрд теңгеден астам қаражат бағытталған.
Ерасыл КЕНЖЕБЕКОВ
