Осыдан біраз бұран AMANAT партиясының Өскемен қалалық филиалы Шығыс Қазақстан облыстық волонтерлер фронт-офисімен бірлесіп «Үміт» балалар үйінің тәрбиеленушілері үшін қайырымдылық акциясын өткізді.
Мемлекет басшысы Қасым-Жомарт Тоқаев биылғы жылды Балалар жылы деп жариялай отырып, балаларға ерекше назар аудару керектігін, өйткені олардың әл-ауқаты Қазақстанның табысты болашағының сенімді кепілі екенін атап өткен болатын.
Президент Балалар жылында «Ұрандар мен мерекелік іс-шараларды өткізу емес, ең алдымен, билік органдары тарапынан балаларды қорғау мақсатында, денсаулық сақтау, білім беру, әлеуметтік қамсыздандыру саласында нақты шаралар қабылдау» керектігін, өскелең ұрпақтың үйлесімді дамуы мен бақытты балалық шағы біздің жалпыұлттық міндетіміз екеніне назар аударған болатын.
Осы ретте «Үміт» балалар үйінің тәрбиеленушілері үшін қайырымдылық шарасы ұйымдастырылды. Акция аясында балалар концерт берді, сонымен қатар бірқатар түлектер грант иегерлері атанып, С.Аманжолов атындағы ШҚУ-да, Серікбаев атындағы ШҚТУ мен ҚАЕУ колледждерінде оқуға мүмкіндік алды. Сонымен қатар облыс пен республика көлемінде балалар үшін мәдени-танымдық сапарлар ұйымдастырылмақ, бұл шараға кәсіпкерлер қолдау көрсетпек.
— Қолдау көрсеткен аудандар мен қалалар әкімдеріне, жоғарғы оқу орындарының ректорларына, қаламыздың кәсіпкерлеріне алғысымызды білдіреміз, — дейді балалар үйінің тәрбиеленушелері.
Қайырымдылық акциясына жиналған жұрт сәбилердің өнеріне риза болып тарқасты.
Дана ТАЛҒАТБЕКҚЫЗЫ
