Жаз маусымы басталғанда, өрт пен судан келетін қауіп күшейе түседі. Әсіресе балалар жазатайым жағдайлардан жапа шегіп жатады. Сондықтан балалар арасында үгіт-насихат жұмыстарын жүргізу аса маңызды.
Жуырда жаз маусымында болатын өрттердің алдын алу және су айдындарындағы қауіпсіздік шараларын түсіндіру мақсатында Зайсан ауданының төтенше жағдайлар бөлімі қызметкерлері мен №25 өрт сөндіру бөлімінің жеке құрамы Сарытерек ауылдық округіне қарасты «Бәйтерек» сауықтыру орталығы жанынан ашылған жазғы лагерьде болып, «Қауіпсіз балалық шақ» тақырыбында акция өткізді.
Қазірде тыныш ағып жатқан өзен немесе толқынсыз көлдің өзі қауіпсіз көрінгенімен, оның да өзіндік қауіптілігі бар. Суға түсу қауіпсіздігін сақтаған жағдай ғана күтпеген оқиғалардың алдын ала аламыз. Акция барысында лагерьде демалып жатқан балалар судан құтқару құралдарымен танысты.
Акцияны ұйымдастырушылар жаздың аптап ыстығында өрттен келетін қауіп те орасан зор екенін түсіндіріп, көкке шығып, от жаққанда абай болу керектігін ескертті. Балаларды өрт сөндірушілердің жұмысымен және өрт сөндіру құралдарымен таныстыра отырып, өрт болған жағдайдағы іс-қимылдар, өрт кезіндегі алғашқы медициналық көмек, суға тұншығу кезіндегі алғашқы медициналық көмек көрсету бойынша практикалық жаттығулар өткізді.
Балаларға өрт және су қауіпсіздігі ережелерін мектеп кезінен бастап үйрете бастайды. Дегенмен де есте сақтап, оны күнделікті өмірде жаттап алуға тырысатын оқушылар кемде-кем. Қауіпсіздік талаптарын түсіндіру ақсатында өткізілген практикалық жаттығуға тек лагерь демалушылары ғана емес, тәлімгерлер, психолог маман мен лагерь дәрігерлері де қатысты. Аталған бөлімдердің қызметкерлері тәлімгерлер мен балаларға өрт және судағы қауіпсіздік шараларын әрдайым сақтау керектігін ескертіп, акция тақырыбы бойынша жаднамалар таратты.
Талшын ҚАЛИАСҚАР
