Қазақстан, Ресей және Беларусь елдері президенттерінің Еуразиялық экономикалық одақтың құрылуы туралы келісімшартқа қол қою рәсімі қарсаңында, халықаралық интеграция шеңберінде Қазақстанның Өскемен, Ресейдің Барнаул және Беларусьтың Могилев қалалары арасында ШҚО әкімі Бердібек Сапарбаевтың бастамасымен 28 мамыр күні «Еуразиялық экономикалық одақ: кәсіпкерлік үшін артықшылық пен болашақ» тақырыбы төңірегінде телекөпір өтті.
Қазақстан, Ресей және Белорусь елдері Президенттерінің Еуразиялық экономикалық одақ құру шартына қол қою рәсімі қарсаңында ұйымдастырылып отырған телекөпірге үш тараптың билік, кәсіпкерлік және ғылым-білім саласы өкілдері, яғни, аты аталған аймақтардың басшылары, ауыл шаруашылығы, индустрия және өндіріс саласындағы кәсіпкерлер, сондай-ақ, студенттік құрылыс жасақтарының өкілдері қатысты. Шара барысында Шығыс Қазақстанның ірі зауыттары, агрошаруашылық өкілдері мен «Өскемен ЭКСПО-2014» көрмесіне қатысушылардың өнімдерінің көрмесі болды.
Қазақстан, Ресей мен Беларусь мемлекеттері арасында тек жылы достық қатынас қана емес, мығым серіктестік байланыс та бекіген. Бүгінгі таңда, шет мемлекеттермен ынтымақтастық және екіжақты тиімді сыртқы экономикалық байланысты кеңейту ШҚО дамуының маңызды бір бағытына айналған. Нәтижесінде Шығыс Қазақстанда Ресей Федерациясы және Беларусь Республикасымен бірлескен 250-ден астам кәсіп-орын сәтімен жұмыс істеп тұр бүгінде.
{jcomments on}Телекөпір барысында Кәсіпкерлер палатасы, «Казмырыш» ЖШС, «СемАЗ» ЖШС, Семей қаласы ет комбинатының өкілдері ЕурАзЭО артықшылықтары, Кедендік Одақ аясындағы атқарылған жұмыстары тұрғысында әңгіме өрбіді. Бүгінде сауда қатынасы бойынша облыстан Ресейге көлік құрастыру, минералдық өнімдер мен бағалы емес металдар шығарылады. Беларусь еліне химиялық және осы саламен байланысты өнеркәсіпке, көлік құрастыру саласына қажетті өнімдер тасымалданады. Сондай серіктестік қатынастың бір нәтижесі: «СемАЗ» ЖШС мен «Минск трактор зауыты» Республикалық біртұтас кәсіпорны арасында бекітілген лицензиялық келісімшарт негізінде түрлі модификациядағы «Беларусь» тракторларын құрастыру өндірісі қолға алынған. 5 жыл ішінде зауытта 4900 трактор шығарылды. 2013 жылы кәсіпорында жүк көліктері мен «Урал» шассиіне орнатылған арнайы техника да шығарыла бастады. Мысалы, өткен жылы 56 автокөлік құрастырылған-ды.
Аймақтар арасында гуманитарлық салада да байланыс дамыған. Өскемен, Семей, Жаңа Сібір, Томск, Мәскеу, Санкт-Петербург, Минск, Дубна қалаларының жоғары оқу орындары бірлесіп, көптеген ғылыми зерттеулер жүргізуде. Мысалы, Курчатов қаласындағы ҚР Ұлттық ядролық орталығында 15 ортақ ғылыми жоба бар. Сонымен қатар, жастар саясатында да алға жылжушылық байқалады. 2010 жылдан бері ШҚО әкімдігімен Беларусь және Ресейдің студенттік құрылыс жасақтары өзара алмасуда. Алтай аймағы және Беларусь Республикасының Могилев облысымен ықпалдастық аясында 2012-2013 жылдары Шығыс Қазақстанда жалпы құрамы 40 адамнан тұратын құрылыс жасақтары болып қайтты. Сондай-ақ, ынтымақтас елдермен туризм, спорт салаларында да серіктестік орнаған. Телекөпір соңында тараптар кәсіпкерлік саласында өзара тиімді ұсы-ныстармен бөлісті.
ШҚО әкімдігінің ақпараттық
орталығының деректері бойынша дайындаған Нұрдәулет КӘКІШЕВ.
