Өткен аптаның соңында алты алаштың ата жұрты — төр Алтайдың баурайындағы Катонқарағай ауданында өткен «Алтайдай жер қайда?!» атты халықаралық айтыстың бас жүлдесін Ардабек Ақбаба алды.
Халықаралық айтыс додасына Қазақстан, Моңғолия, Өзбекстан, Қырғызстаннан келген атақты айтыскерлер қатысты. Айтыстың жалпы жүлде қоры 20 млн теңге болды.
Бірінші орынды қызылордалық ақын Мұхтар Ниязов қанжығаласа, екінші орынды Еркебұлан Қайназаров пен Рүстем Қайыртайұлы бөлісті. Қазірет Бердіхан мен өзбекстандық ақын Талғат Орынбеков үшінші орын алды.
Айтысқа сонымен қатар Әсем Ереже, Шұғайып Сезімхан, Қалижан Ділдашев, Жарқын Жұпархан және басқа да танымал от ауызды, орақ тілді айтыскерлер қатысты.
Айта кетер болсақ, сөз барымтасындағы саңлақтардың қарымын Ұлықбек Есдәулетов, Серік Қалиев, Дәулеткерей Кәпұлы, Алмас Ахметбек және Серік Құсанбаев сынды салмақты ақындар бағалап, қазылық етті.
Қазақтың ақсүйек өнерін тамашалуға Катонқарағай ауылындағы стадионға үш мыңға жуық көрермен жиналды.
Айтыстың жүргізушісі, Қазақстан Республикасының еңбек сіңірген қайраткері, танымал ақын Жүрсін Ерман ашық аспан астындағы тұмса табиғат бүгінгі айтыскерлердің шабытына арқау болғанын айтты.
— Бүгінгідей ашық аспан астында, тау бөктерінде айтысты өткізу тамаша идея болды. Себебі мұндай тұмса табиғат ақындарға зор шабыт сыйлайды. Қазір айтыстың деңгейі әлдеқайда жоғары. Өйткені айтыскерлердің көбі ғылым бағытында жүр. Бұл, әлбетте, айтыстың интеллектуалдық деңгейін өсіреді. Бүгінгі жастардың да айтысқа бетбұрысы ерекше. Айтыстың болашағы зор. Моңғолия, Қырғызстан, Өзбекстан секілді шетелдердегі қандастарымыздың да қызығушылығы артып келеді. Мұндай фестивальдар алдағы уақытта да жалғасын табатынына сенемін, — деді Ж.Ерман.
Ұлттық өнердің өңірде насихатталуына Катонқарағай ауданының Тұрақты дамыту қоры бастамашылық етті. Көзделген басты мақсат өңірлердегі айтыс өнерінің шығармашылық әлеуетін дәріптеу болатын.
Аудан басшысы да ақындардың қадамына құт тілеп, жиналған халыққа алғысын жеткізді.
— Жалпы, бұл күн ауылымыз үшін ерекше. Төл өнерімізді насихаттап жүрген арқалы ақындар Катонқарағайда бас қосып жатыр. Айтысты көруге жиналған ауыл тұрғындарының, қонақтардың ықыласы ерекше. Мұндай фестивальдар алдағы уақытта міндетті түрде өңірімізде жалғасын табады, — дейді пікір білдірген Катонқарағай ауданының әкімі Ділдар Қалиқан.
Сондай-ақ ойдың тұнығын, сөздің шымырын теріп, көрерменді қуантқан қатысушы айтыскерлерге де қаржылай сыйақы табыс етілді.
Динара НҰРЛЫБЕК,
«Семей таңы»
